Billy Graham Crusade, Yangon ah Zomite' Choir Sading Sapna

Dear Zomipih teng,

Atung a thutawh kizui in Nov 18-20, 2016 sunga akibawl ding alawp huai mahmah Kawlgam ah a om ngei nailo Billy Graham Crusade pi ah Yangon a om Zomi tengin George F. Handel in aphuah HALLELUJAH CHORUS lapi tawh phatna choir sa dingin Rev Dr Simon Pau En hong zaksakna tungtawn in hong tangko khia ingh.

Anuai a hungelna bangin ih biakinn tek leh Zomipihte tungah ih gen sawntek nang in Topa mintawh hong zasak ingh.

1) Lasin niding NOV 20 [Sun]
- Amun: TBCY biakinn
- Ahun: 2:00 - 3:30 pm

2) Lasak niding - NOV 20 [Sun]
- Amun: Myanmar Convention Center
- Ahun: Zan kikhop hun

3) Tutna ding mun - State tung a special a kibawl choir seat ah.

4) Kuateng in sa ding - Hallelujah Lapi a sa thei, asa ngei khempeuh [250 voices kideih]

5) Puansilhding: Ih minam puan.

6) Bus vaihawm zia: Khua sung a om teng in Nov 20 [Sun] 1:00 pm in khuasung Emmanuel Biakinn mai pan in TBCY biakinn ah lasin dingin pai ding.Tua lo teng in TBCY ah 2:00 pm lap in pai ding.

7) 2:00 -3:30 pm sung lapi sin leh lep thuah in ih man khit teh nek leh dawn khat nei in TBCY biakinn pan ding khia ding.

8) MCC choir sakna mun ah 5:00 pm in tungkim, choir seat ah tukim litlet ding.

Tutung a pen lep le sak thuahpah ding suak hang. Ahang pen Pawivaihawm makaipite kiang pan athu tuni (Nov 12) in aki za hi a, banghang? cih thu kidong nawn selo in lungdam lua ei, ci-in aki sang ziau hizaw hi. Hallelujah lapi pen 2005 lai in Tedim khuapi ah aw 4000 in sakhin hang a, tu'n lapi asa ngeiteng peuhpeuh a kikai khawm ih hihi. Hih bangdan in ih ki kaihkhop ngamna pen Tedim a Zomi Festival of Praise ah Hallelujah Lapi tawh Topa min ih phatkhopna i deihna bulpi khat ah akihel ahi, "Zomite' mailam teh ih omom na, ih tuntun na mun ah Hallelujah Lapi tawh Topa min phat thei ziau ding" cih thu ahi hi.

Yangon a kibawl ding Billy Graham Crusade min pen LOVE JOY PEACE FESTIVAL kici hi. Hih pawi tawh kisai Rev Khoi Lam Thang genna-ah:

- Thugen pi ding Billy Graham' tapa Franklin Graham ahi hi. 

- Pawipi sungah ei Zomi te mah bangin, Kachin, Karen le Kawl in zong sa ding uh hi. 

-Nipi nitak pen ei Zomi Choir bek hiding hi. A nunung pen nitak ding hi a, a lamdang Pasian nasepna lianpi mu dingin kilamen hi.

- Khang masa ten a lamet ban loh uh ei khang a kibawl  hih Love Joy Peace Festival pen Kawlgam Khristian tangthu a kilamdangsak ding vai lianpi a kingaihsun ahi hi.

- HALLELUJAH lapi ei pau tawh a sa dingin hunpha i ngah zenzen hampha mahmah hang. Mi 4000 in Tedim a ih sak  maban a kizom lai hi mawk hi.

KUMPITE ' KUMPI, TOTE' TO PA PHAT KHAWM NI.

FESTIVAL KIGINNA

1. Yangon huam sung pawlpi 519 om a, tu ciangciang 452 pangkhawm hi.
2. ANDREW (Pawlzawn ding) mi 7000 kideih hi a, 3842 kingah zobek hi.
3. PETERS (Gupna thu ngai ding) 21000 ki target pen 19520 kingah khin hi.
4. Ferry ding mawtaw 500 val a ready khin ahi hi.
5. Kumpi lam pan phalna lai zani (Nov 11) in kingah pan hi.
6. Stage le mun phual khempeuh a lam ding mi 30 val Thai pan hong tung khin uh hi.
7. Usher khangno 500 in mapang ding hi.
8. Thungen pawl in ni thum antan thungetna Tantaunggyi ah nei uh a, a lamdang tampi piangin, lungmuang takin hong ciah uh hi. Ni 40 thungen te zanhalni (Nov 10) in cingta hi.
9. Franklin Graham tawh leitung mun tuamtuam pan zin lian 30 kiim in hong kihel zo ding hi.
10. Franklin Graham kam phen ding Dr Aye Min hi ding a, hun zat bup nai 1 sawt lo ding hi. Sun in vai bangmah om lo dinga, thunget hun ding hi, kici hi.

Tua ahih man in ih omna mun tek pan in festival pawipi ading in thungetna tawh leh choir lasak na ah hoihtak, ngaihtak in Topa min ih phat khop theih na ding in ih biakinn tek ah tangko in thungen a, LAPI sa thei khempeuh ih kihel kim tek nangin Topa min in itna tawh kong zawn uh hi. Lungdam.

Vekpi tangin,

David Suum