Tedim khuapi ah Naupang khat

Zomi pasal no khat Tan 5 a pha pan Tedim sangpi ah sang kah hi. Amah pen khedap hoihzong neih mello in sang pai den hi. A sang paina lampi ngei ah lingkung pawl khat lampi ah na kaisuk theizel hi. Tuate aman hem khiazel in, tua lampi a tawn a lawmte adingin Thupha bawl zelzel hi.

Tua lampi atawn khate ading bek Thupha a bawl hilo in, Zogam, Zomi, Kawlgam ading mahmah in zong Thupha a bawl naupang na gige zaw hi. Zogam leitang ah na hoih a sem, a bawl mikhat peuhpeuh pen Zomi ading na hoih a sem abawl mi hi'ng cih ki telcian mahmah ding thupi hi.

Gamdang ah sangkah mihaupi, Zomi sungah mi minthang ih suak phial zongin, Zogam leitang adingin na sep khiat ih neih kei aa, online ah ih ot ot tengtawh nitum zel ihihleh ih pilna neih pen ei bek Gilpi khap khat a khual hilel aa, Khedap hoih a neihlo sangkah naupangte tungah hun saupi a sawt phial zongin lam-etna lianpi Zogam Zomi in ki neihzaw thamtham hi cih mipi ten ih tel ding Thupi hi.

Zogam ah lamngei aom a hoihlo singkung khat, ahoih in na bawl bekzong gamdang panin pilna tawh a awng awng mipa sangin a Mangpha na hihlam ki phawk tawntung in maw Zomi...Zomi Mainawl zel ni.

ThawnTuang
Zomi Angvaan
Nashville TN
September 8,2016