Nidang lai-in munphiah kung pua mi khat in munphiah kung 2 hong zuak hi. Munphiah kung lei pa in munphiah kung 1pen inn tungah munphiatna ding hi-in , Munphiah kung 1 leuleu pen lei lak phiatna ding ci-in hong lei hi.
Lei lak ah munphiah pen nisim in akih huai mahmah ek dum te khawng khoih kha in, aham phiatphuat suangsi te phiat kha ahihman in ama nuntakna pen hong haksa toto ta hi.
Hihte hong ngaihsun in ama nuntakna amah hong thanem thei ta hi. Inn tunga aom kha munphiah hi leng nuam ding hi ven, ama nuntakna pen nisa cihbang om lo, aham phiatphuat suangsi te phiat kha lo, ek dum, zun dum tawh kimu kha lo, ama nuntakna bel nuamtak in cei maw ci-in ama lawm ahi inn tunga aom kha munphiah pen tha hong ngah mahmah hi.
Tuaciangin amah pen inn tungah om kha ahihman in amah pen anam tui mahmah inn sungah om kha ding, kei bangin anuntakna haksa loding hi, kei zong ama nuntakna bangin om kha leng hoih ding hi ven ci-in atawngtungin ngaihsun thei zel hi.
Tualeh nikhat! Munphiah te lawmta kahlei kiangah hong kimu kha uh hi. Amaute gel thu hong kigen uh hi. Lei lak ah aphiat kha munphiah in lawm aw nang na nuntakna nuam mahmah hi.
Kei bangin haksa sese lo! A kihhuai na te khoih kha lo! Nang na nuntakna bel nuam mahmah ding hi ci-in gen hi. Nang na nuntakna bangin om nuam lua ing ci-in gen den hi.
Tualeh inn tungah aom munphiah in gen leuleu hi, ataktak in cileeng apua tham in mu hileeng bel anuam mahmah dingin ummawh thei ding hi teh! Nuam tuanlo hi! Nupa kitawng khawng omleh kei pen hong lakhia in satna in hong zangh uh hi. Alang leh alang pan hong kaai gawp uh hi.
Innkuan sungah tanu,tapa te thumanglo khawng aom ciang sat ding ahih ale kei hong zangh uh hi. Kei ka nuntakna pen nang bangin haksa ahihloh hangin nisim beng am bangin liamna kithuak kha hi, lungsim nawngkaai na tam mahmah hi.
Kei pen gimna ka thuak loh hangin lungsim nawngkaai na bek bek hi. Tuaciangin kei pen koi ah hong koih uh hiam cihleh mite khesiakna ah hong koih hi. Mi hong pai leh hong phul in, hong sik in, nang aw... misi giimnam cei ci-in hong gen uh hi. Tualeh lei lak ah aom munphiah in ama nuntakna amah alungkim bangin hong kingaihsun ta hi.
Aman angaihsut ciangin aw aw.... apua tham ahoih hangin nuntak haksatna tuamtuam te pen kei sangin tampi na thuak zaw ahi ve maw... ataktak in cileeng hang kei ka nuntakna pen ahaksat hangin amah bangin haksa lo zaw ahi ve maw...ci-in ngaihsun in lu kun sa in amaute gel aom na mun tek vuah ciah kik uh hi.
Leitung mihingte zong hih tangthu mahbangin apua tham ahaksat zongin lungim sak kei in! Inn hoih nono sungah om in, anam tui nono sungah aom uh hangin tha ngah kei in! A pua tham hoih in asung tawng a uih zong tam mahmah hi.
A taktak in cileeng ei i ngah nuntakna pen hamphatna dingin pia khia in,leitung pen ahoih a ih puah theih khak pen lungkimna ahih theihna ding hanciam in ih om thei kul hi. A pua tham ahaksat hangin asung tawng anamtui ahih theihna ding hamciam in ih om theih ale nuntakna nuam mahmah ding hi.
By; Thomas Tuang HL
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.