US LEH RUSSIA IN SYRIA AH CEASEFIRE HUN SOT TOH DING THUKIMNA NEI
May 5,2016: US State Department in US leh Russia in Syria ah Ceasefire palsatna a om kawikawi hangin a hun sot beh toh lai ding thukimna kinei a, Aleppo khuapi ki-umcihna (besieged) sung leh Aleppo province sung zong huam ta dingin thukimna kinei thei ta hi ci-in zanin pulak hi.
US State Department spokesman Mark Toner in hih ceasefire thukimna pen zan nitak nai 00:01 (02:00 GMT) panin kipan hi ci-in gen hi. Syria galkap ten hih kikaptuah khawlna ding thukimna "regime of calm" kici pen Aleppo ah nai kal 48 kinei ding hi ci-in gen hi ci-in Russiate UN ambassador Vitaly Churkin in UN Security Council ah pulak hi.
Hih kikaptuah nawn lohna ding thukimna pulakna ding piang thei ding hiam ci-in US leh Russia in lim takin a kan tel masak manun a hun kipulak zekai deuh hi ci-in Al Jazeera reporter Rosiland Jordan in Washington DC panin gen hi. Russia in President Assad leh a kipawlpihte hopih masa a, US in Syria kumpi langpangte (oppositions) hopih masa in, amau thukimna bang tawh hih ceasefire hun sot beh lai ding thukimna kinei hi ci-in US State Department statement in gen hi.
United Nations Humanitarian Affairs chief Stephen O'Brien in UN Security Council ah a genna ah Syria buaina hanga nautang site kimangngilh lo dinga, Syria kumpi in tung lam pan leh Syria rebels ten rocket zangin zato inn, nautang mite teenna mun leh dam lo puakna mawtawte kap uh ahih manin a gamtatna bangun thukhenna thuak ding uh hi ci-in gen hi. Syria galkap leh rebelste gamtatna pawlkhat pen 'war crimes' leh 'crimes against humanity' tawh ciamteh theih ding tampi om hi ci-in O'Brien in New York khuapi ah UN Security Council ah gen hi.
Syrian Activists leh rebels ten Syria buaina a kipat kik nung Aleppo khuapi bekah a beisa ni 10 sungin mi 250 sih beh hi ci-in gen uh hi. SOHR in zanin zong Aleppo ni tumna lamah kikaptuahna hangin mi 12 val sih beh a, kikaptuahna om lailai hi ci-in gen hi.
Source: Al Jazeera and agencies
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.