SYRIAN REBELS TEN CHEMICAL WEAPONS ZANG DING UH HI: A.I.
May 14, 2016: Amnesty International in Syrian rebel group ten Aleppo ah Kurdish district a umcihna uh-ah zatui tawh kibawl galvan lauhuai (chemical weapons) leh gas gas koihna bung (canister) pan-a kibawl "hell cannon" kici thautang zong zang ding uh hi ci-in gen hi. Syrian rebelste Jaish al-Fatah tawh kipawl in Aleppo khua sunga om Kurdish Sheikh Maqsoud district nasia takin sim uh a, chemical weapons kicite zangin inn, sumbuk leh biakinn (mosque) te suamin nautang that ding uh hi ci-in a upmawh thu gen beh hi.
Amnesty in zan in report a piakna ah rebels ten a galvan zatte uh pen ngimna kician zong a kha thei lo leh uk theih loh 'unguided projectiles' siktum (mortars), a kibawl tawm home-made "Hamim" rockets leh gas-canister rockets hi ci-in gen hi. Hih "Hell cannon" projectiles kicite pen an huanna dinga kizang (cooking-gas) canisters panin kibawl a, a sik bung sungah a puak thei van koih uh a, a kibawl tawm thaupi 'home-made canons' kici panin kap uh hi. Hih Kurdish minamte teenna Sheikh Maqsoud district sim rebel ten nung kha bul in Geneva ah Syrian Peace Talks a kineih hun lai-in palai sawl uh a, Ahrar al-Sham leh Army of Islam kici gamnuaimite dona ding leh lakna dingin hih mun a sim uh hi ci-in gen beh hi. Sheikh Maqsoud district pen IS dona ah a madawk pen-a kigen Kurdish People’s Protection Unit (YPG) forces kicite ukna hi a, mi 30,000 kiim tenna mun ahi hi. YPG, Jaish al-Thuwar leh Kurdish thau tawi pawl tuamtuamte kigawmkhawmna Syrian Democratic Forces kicite spokesman Taj Kordsh in a genna ah a beisa hunin zong rebels ten Sheikh Maqsoud district tampi vei hong sim ngei uh hi ci-in gen hi. US ten hih rebels pawl tuamtuamte zong huhna pia in, Kurdishte zong huhna piakhawm uh hi. Tu-in Syria kumpi do dinga huhna a piakte uh kido leuleu ta uh hi. Hih thu pen hong piang peelmawh ding hi ci-in Russia in IS, Al-Nusra Front, Ahrar al-Sham, Army of Islam leh rebel tuamtuamte khen tuam se loin Syria a kap cil un na nuai khawm pah uh a, ahih hangin US in rebelste kap nawn kei un ci-in kun niloh ahih man un kidawm deuh ta uh hi. Rebels ten Homs province ah Syria kumpi ukna khua khat a lak kik man un zan hal a kipanin Russia ten Aleppo ah rebelte kap kipan kik hi.
Syrian Democratic Forces kicite spokesman Taj Kordsh in rebels ten chemical weapons kicite zangin nautang kap uh hi cih a lim tawh lahna ding (proof) kinei hi ci-in gen hi. Amnesty in a genna ah February panin April kikal sungin rebels ten Kurdishte teenna district sungah nautang 83 (naupang 30 kihel in) that uh a, a thahte uh min kiciamteh a, Mohamad kicipa' inn rebels ten April 5 ni in "Hamim" rocket tawh a kapna uh-ah a innkuanpih mi 7 in sihna tuak hi ci-in gen hi.
-Al Jazeera
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.