IS TEN IRAQ AH REAL MADRID CLUB GUMTE HEADQUARTER BULUH IN MI 16 THAT
May 14, 2016: Zan hal nitak in Iraq khuapi Badhdad panin km. 50 gamla a om Balad khua-a Real Madrid supporters club ten headquarter dinga a zat uh Al Furat Cafe kici ISte mi thum in AK-47 thau tawh suam uh a, tua sunga omte va phegnkap gawp uh hi. Hih mun kisuamna hangin mi 16 si a, mi 20 val in liamna tuak uh hi. A si leh a liamte lakah Real Madrid football club gum/deihte (fans) bek hi loin cafe staff (nasemte) leh cafe hawhte zong kihel hi.
IS ten tukpeng kimawlna kimudah in, kideih lo ahih manin hih mun ka suam uh hi ci-in pulak uh hi. Al Furat Cafe ah thautang khakna mun vang tampi muh theih ding om a, tutnate (chairs) kilumlet zelzul in, Real Madrid club deihte' kimuhkhawmna meeting room kicihna sualah sisan kizel ziazua hi.
Real Madrid club ulian ten hih mi 16te sihna hangin a dahpihna leh a thualpihna pulak uh a, a si leh a liamte thuakpihna lahna dingin tu nitak ciangin Real Madrid leh Deportivo La Coruña clubte puai (match) ah Real Madrid players ten a baan uh-ah puan vom (armbands) khih ding uh hi ci-in pulak uh hi. Real Madrid club ten a website uh-ah, "Real Madrid C. F. in Al Furat Cafe kisuamna hangin mi 16 site leh mi 20 liamna tuakte leh a innkuanpihte dahna a kibangin kidahpih in, kithuakpih hi. Leitung-a Madridismo khempeuh in Iraq gam-a sihna tuakte hangin khitui leh naptui kinul tek a, a sihna uh kimangngilh ngei lo ding hi," ci-in tuangsak uh hi. La Liga president Javier Tebas in a tweeter panin hih thupiang lamdang a sakna leh a si leh liamte a thuakpihna thu pulak a, tu kha in Iraq zin kisawm a, security vai hangin a hun kisot to hi. Football ukte gupna pia dingin a sawt loin Iraq ah kihawhpah ding hi ci-in gen hi.
-The Mirror
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.