LONDON MAYOR DINGIN PAKISTAN GAM MI KITEELCING
May 7, 2016: London Mayor kiteelna ah British Labour party candidate Sadiq Khan in a kinaihpih pen Conservative party Zac Goldsmith (35%) zo a, 44% ngah hi. Sadiq Khan pen Muslim mi lak panin London Mayor ngah masa pen hi a, a cin'nna hangin a lungdampihna Labour party makaipipa Jeremy Corbyn in zan in pulak hi.
Conservative MP Zac Goldsmith in a vote zon'na (campaign) ah Sadiq Khan pen Muslim ngongtatte tawh kipawl a, Brussels leh Paris khuapi kisuamna hangin Muslimte huatna, Jewte huatna, biakna leh minam kideinna taangkopih in a hanciam hangin lawhsam veve hi.
London khuapi pen milip 8.6 million pha a, tua lak panin Mikang lo namdang 3 million kiim pha a, Muslim mi million khat bang om hi. Hih nam tawm ten vote 16% bang nei uh a, amau gupna hangin zong vote tampi tak Sadiq Khan in ngah hi.
Sadiq Khan pen kum 44 mi hi a, 1960 kumin a pate Pakistan panin London a peem uh hi. Sadiq' pa pen bus hawl hi a, a nu pen puankhui a nek zong hi lel hi. Sadiq Khan in Law sin a, a man khit ciangin human rights lawyer (thukhen) in pang hi. 2005 in London khuapi ah Tooting constituency panin Labour MP ding kiteelcing hi. Labour party ten vaihawmna 2010 in hong let un Prime Minister Gordon Brown in Sadiq Khan pen minister for communities dingin seh a, tua khitin transport minister lensak kik hi.
Source: Al Jazeera and agencies
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.