ISRAEL TEN SYRIA AH HEZBOLLAH MAKAI LIAN KHAT KAPLUM
May 13, 2016: Israel ten tu kalin Syria gamah Top Hezbollah commander Mustafa Badreddine (kum 55) tung lam panin kaplum uh hi ci-in Lebanon gam pansan Hezbollah ten pulak uh hi. Hezbollahte pen Israel galkapte tawh a kido den Shia Muslim gamnuaimi kipawlna hi a, Syria gamah Syria kumpi leh galkapte gum-a ISte do a om uh ahi hi.
Hezbollah ten a genna ah Mustafa Badreddin pen 1982 kum panin galdo in pang den a, jihadi makai lian ahi hi ci-in tu ni-in a sihna thu pulak uh hi. US kumpi Syria ah a kigolh manin Syria President Bashar al-Assad' galkapte huh dinga Syria gamah va kuan a, Pithai (Tuesday) ni zanin Damascus airport kianga om Hezbollahte phual Israel ten tung lam panin a kapna ah sihna tuak hi ci-in gen beh uh hi. Damascus airport kianga Hezbollahte phual ah bomb puak a, tua pen bomb hi ding hiam, missile hi ding hiam, thaupi hi ding hiam ahih kei leh tung lam panin kikap hi ding hiam cih kikanpha lai a, Israelte gamtatna mah hi ding hi ci-in gen beh uh hi.
Israel ten 2008 kumi Hezbollah makai Imad Moghniyeh a thah khit un a za laih dingin Mustafa Badreddine kiseh a, ama' sihna hangin Hezbollah ten Syria nusiat san lo ding a, Syria buaina a ven' dong ki-om den ding hi ci-in Hezbollah ten gen uh hi. Lebanese TV station al-Mayadeen in bel Mustafa Bedreddine Israel ten tung lam panin a kapna hangin si hi ci-in gen hi. Israel galkap ten hih thupiang tu dong bangmah gencian nuam lo uh hi.
Mustafa Badreddine pen a phamsa Hezbollah military commander Imad Moughniyah' makpa hi a, United Nations gup Special Tribunal for Lebanon in 2005 Lebanon Prime Minister Rafik al-Hariri that hi ci-in ngawh hi. 1983 in Kuwait ah bomb puakna ah a kigolh manin Kuwait kumpi in zong sihna dan piak dingin thukhenna na pia hi. Thongah a kithah ding ngakin a om lai in 1990 kumin Saddam Hussein in Kuwait a sim lai-in thonginn panin tai khia in, suakta hi.
-Reuters/Al Jazeera
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.