US TEN BALTIC SEA AH KIDONA TEEMBAW TAISAK
April 16, 2016: US ten Navy destroyer USS Donal Cook (DDG 75) kici kidona teembawpi April 11 leh April 12 in Russia gam kianga om Baltic Tuipi ah NATOte kidona helicopterte puasak in galdo ding sinna va nei uh hi. April 11 ni in Russia ten hih teembaw kiangah S0-24 vanleng nih nai 3:00 pm in USte teembaw nawk kha dek takin va lengsak vauvau uh ahih manin US ten Russiate vanleng a len' khiat ma teng a galdo ding dan sinna neih khol cip uh hi. April 12 ni in Baltic Tuipi mah ah (hih ni bel international waters ah taisak uh hi) galdo ding dan sinna nei nawn leuleu uh a, Russia ten KA-27 Helic helicopter sagih zangin USte teembaw kiang nai-ah nai 5:00 pm in niam cikin 11 vei va lengsak kik leuleu uh hi. US ten NATOte helicopter zong lengsak uh ahih manin vanlengte a kinawktuah khak lohna dingin 'safety advisory' ding ci'n Mangpau leh Russia pau in Russia vanleng hawlte kiangah na kihemkhia un ci'n zasak uh a, ahih hangin Russiatte vanleng hawl ten thudon lo uh hi.
Hih thu hangin US ten vanleng kitaihtuah khak ding a lauhna thu leh Russiate gamtatna pen galdo siamte gamtat zia hi lo a, kitheihsiam lohna a khansak banah lauhuai hi ci'n gen a, Russia ten hong phin nop man hi ci'n leh ngawh hi. US Secretary of State John Kerry in zong hih thupiang pen lauhuai hi ci'n gen hi. Ahih hangin Chinate Global Times newspaper in tu ni-in open page ah a genna ah Russiate vanleng hawl ten tua bangin mun lauhuaina ah buaina bangmah piang se lo dingin vanleng hawl thei uh ahih manin siam mahmah uh a, US ten Russiate a phin sawm hangin Russia ten USte na maizumsak (humiliated) dimdem in, Russiate vangleng hawl ten a siamna uh va lak hi ci'n suaksak hi.
US in Baltic countries/state kici Latvia, Lituania leh Estonia (NATO member vive) gamte a gupna uh a lahna dingin hih kiim ah galkap leh kidona vanleng leh teembaw tampi koih ta hi.
-America's Navy/Sputnik
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.