US TEN AFGHANISTAN AH MSF-TE HOSPITAL A KAPSAK UH KISIAMTANNA THU GEN
April 30, 2016: Taliban ten nung kumin Kunduz khuapi tawlkhat sung a lak lai un a si leh a liam tam mahmah hi. Doctors Without Borders (MSF) ten a sep ding bangin tavuan la-in a zato inn uh-ah Taliban galkap liamte, Afghan galkap liamte leh nautang liamte tuu leh keel bangin khen tuam se loin na kem uh hi. Hih thu lim takin US in thei napi US in Geneva Convention palsat in Talibante tua zato inn ah a liam lum om uh hi ci'n Oct. 3 in va suam uh a, a gal dona mawtaw uh khat tua zato inn kongah Taliban ten na kapsak uh a, awkci kha ahih manin tua mawtaw a tuang galkapte hutkhiatna dingin tung lam panin tua MSFte zato inn va bu kap gawp uh hi. MSF ten US galkap uliante hopih in hih mun a kikap nawn lohna ding zasak uh a, ahih hangin US galkap ten kap zom veve uh hi. US galkap ten mi 42 va kaplum uh hi. A site lakah zato inn a lum dam lo 24 leh MSFte staff member 14 a sih banah mi 37 in liamna tuak hi. Hih thupiang hangin human rights tampi ten USte ngongtatna a mawhpaih thu uh leh 'war crimes' hi ci uh hi.
US Army General Joseph Votel in zanin hih thu piang kanna 'internal investigation' kizo ta hi ci-in a report pulak a, "technical leh human error" hilhkhialna ahih manin 'war crime' hilo hi ci-in kisiamtanna thu gen hi. General Joseph Votel in hih thupiang kanna report ah tua zato inn kap a kihel galkap ten zato inn a hih lam thei lo hi ci ta zen hi. US Special Force (Commando) galkapte pen Afghanistan ah 2001 khit nungin ki-omsak a, GPS leh galvan hoih pen zang galkap buangin zato inn ahih lam thei lo hi a cih pen nuihzak huai mahmah hi. General Joseph Votel in galkap ten tua MSF Trauma Center zato inn panin metres 400 gamla a om gamnuaimite ukna mun kap sawm uh a, Talibante omna sa in tua zato inn kap khial kha uh hi ci'n gen a, zato inn pen kapna dingin kiciamteh lo a, AC-130 vanleng hawl ten radio system buaina tuak uh ahih manin tua zato inn kap kha uh hi ci'n paulap ding zong pong hi.
MSF ten bel hih thupiang kanna (investigation) vai pen US galkapte bek in nei in, independent body' thukanna hilo ahih manin kilungkim zo lo hi ci hi. "Tu ni-in US galkapte thugen pen kuamah uk loh (uncontrolled military operation) galdo dingin khuapi sunga mi tam mahmahna munah galkap kisawl a hih thu pulakna tawh kibang a, US in gal omna mun-ah thukham zuih ding (basic laws of war) kikhungte zui lo hi," ci-in MSF President Meinie Nicolai in gen hi.
MSFte zato inn kapte lak-a kihel galkap 16te (general officer khat kihel in) dan (discipline) kipia dinga, ahih hangin thukham palsat hi cih ngawhna (criminal charges) kuamah tungah kiciamteh lo hi ci-in Army General Joseph Votel ci'n gen hi. Dan kipia dingte lahah galkap kigolh tengin training a lak thak ding, a command na panun tawl khat tawpsak ding, counselling piak kik ding cih kihel a, a site innkuanpihte tungah a galna dingin $ 5.7 million kipia ding a, tua zato inn zong kipuahphatsak kik ding hi ci'n US galkap ulian ten gen uh hi. Ahih hangin tua thupiang khit nungin MSF ten Kunduz khuapi nusiatsan pah uh hi.
Source: DPA
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.