UN IN SYRIA GALKAP TEN REBELSTE UKNA A UMCIHNA KHUAPI PANIN HUH DING KISAM DIAKTE PUAKHIA
April 22, 2015: Geneva, Switzerland ah Syria buaina tawh kisai kilemna thugenna - Peace Talks ah a kihel Syria kumpi leh Syria kumpi lehdote (rebels) ceasefire palsatin kingawh tuahin kilemna thugenna lawhcing loin ki-ak gual khen uh a, kikaptuahna a nasiat kik luat ma-in ci-in zanin UN in Syria galkap ten rebelte ukna khuapi a umcihna (besieged) munte panin huh ding kisam diak - liamna tuakte leh dam lo mi tampi va puakhia uh hi.
Turkey-Syria border gamgi pen IS ten rocket tawh kap mun diak se uh ahih manin hih kiim-a om khuapi li panin dam lo leh liamna tuakte leh a innkuanpihte uh mi 500 val kipuakhia in, bitna munah kipuak hi ci'n UN spokesman Stephane Dujarric in gen hi. Hih damlo leh liamna tuakte kipuak khiatna mun khuate pen Syrian rebelste ukna Damascus khuapi kianga om Zabadani leh Madaya leh Idlib province sunga Syria kumpi ukna Foua leh Kefraya khua hi ci'n gen beh hi. Rebelte ukna Madaya khuapi ten Syria galkap ten sawtpi umcih ta uh ahih manin khuamite nek ding kipuaklut thei lo ahih manin nung kumin gilkial in mi 24 val puksi khin ta hi.
Zabadani leh Madaya khua panin bitna munah kipuakhiate pen a tamzaw nautang hi a, tuate lakah galkap liam 25 zong kihel hi ci'n AP news in suaksak hi. Aleppo ah zong kikaptuahna nasiat luat manin nautang 40,000 val bitna mun delh in taikhia ta uh hi ci'n UN in zanin gen hi. Syria galkap ten a gam khahsuahna munte lak kik ding hanciamin nasia takin nawk ta uh hi. Kikaptuahna a kipat kik manin Syria-Turkey gamgi a om Azaz khua-a tengte, Bab al-Salameh khua leh Sijjou refugee camps a omte nisuahna lamah tai uh hi ci'n UN Office for Humanitarian Affairs in gen hi.
Doctors Without Borders (MSF) ten Turkey gamgi (Syria leitang lamah) galtai mi 100,000 val mainawt thei lo, nungkik thei loin awkcip uh hi ci'n gen hi. Nung kalin IS ten galtai mi 35,000 omna mun la uh a, hih mun pen gal kidona phualpi suak dingin ki-ummawh hi. Turkey in zong galtai deih nawn loin a gamgi uh na khak hi. Syria kumpi leh rebel ten a khuapi umcihna panin a kihepkhiatna dingin UN in kunh hi. Geneva Peace Talks pen lawhsam a, lawhsam kei leh a ngimna pen Syria gamte thukham (constitution) gelh phat kik ding, kumpi kilaihna ding vaihawm ding leh Parliamentary election September 2017 ciangin neih ding cih kihel hi.
-Al Jazeera and agencies
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.