TEENNA DING INN NEI LO NU HARVARD UNIVERSITY TUNG ZO

TEENNA DING INN NEI LO NU HARVARD UNIVERSITY TUNG ZO

Elizabeth Liz Murray pen September 23, 1980 in Brox, New York khuapi ah suak hi. A nu leh pa pen a zawn' mahmah banah khamtheih zongsang tuak uh ahih manin a nih un HIV ngah uh hi.

Kum 15 bek a phakin a nu AIDS natna hangin 1996 kumin si a, a pa pen inn nei lote kikepna ah kikoih manin Liz Murray leh a sanggamnu, Lisa zong teenna ding inn nei lo suak hi.

Teenna ding a neih loh banah omna ding kician leh a kem ding gina a om loh manin high school kah hak mahmah hi. Liz Murray in Chelsea, Manhattan khuapi ah Humanities Preparatory Academy kicihna ah sang hong kah a, kum nih sungin graduation hong zo hi. A sangkah kawmin a sanggamnu (a u nu) sangkahna ding sum lawh lai hi. Mi gentheite adinga kibawlsak huhna - New York Times scholarship kici hong ngah a, leitung bup a university hoih pen pawl a kigen, research bawlna dingin a hoih pen thumna a kiciamteh undergraduate leh post graduate zong sin theihna Harvard University, Cambridge, Massachusetts, United States ah hong kah hi. 2000 kum tuuk hun lai (fall semester) in matriculation hong zo khia hi.

2003 in a pa hong gim sia mahmah ahih manin a pa kem dingin Harvard nusiatsan hi. A pa' omna tawh kinaih thei pen ding ngaihsutna tawh Columbia University ah a laisim hong zom kik leuleu hi. A pa'n 2006 kum in AIDS natna hangin sihsan leuleu hi. 2006 bei kuanin Harvard University hong zom kik a, August 2009 in clinical psychology ngahna ding leh counselor sep ding a lunggulhna hangin Harvard Summer School graduate courses la hi. 2010 in Psychology graduation hong zo hi. A sanggamnu Lisa in zong Purchase College, New York State panin graduation a man khit ciangin mi dang kua hiam cih a khentel thei lo, lungsim veng lote (autism) kikepna sanginn ah sangsia sem hi.

2003 kum in ama nuntakna tangthu "Homeless to Harvard: The Liz Murray Story" kici movie in kibawl hi. September 2010 in ama tangthu laibu in "Breaking Night" kici New York Times (US) leh Sunday Times (UK) kipawlin bawl uh a, bestselling memoir ci'n kiciamteh hi.

Liz Murray in 'Manifest Living and a motivational speaker' kici phuankhia a, a director zong len pah hi. May 19, 2013 in honorary doctorate of public service kici Ph.D degree Merrimack College, North Andover, Massachusetts in pia hi. Tu-in Liz Murray pen Washington Speakers Bureau ten professional speaker dingin zang uh hi. Hatsatna leh cihmawhna tawpkhong tuakte tungah thugenna nei kawikawi a, a thugenna panin mi tampi nuntakna kilamdangsak hi.

A pianpih min: Elizabeth Murray
A pian ni: September 23, 1980
Bronx, New York City, NY
Min dang a kisap : Liz Murray
Sangkahna : Harvard University
Nek zonna : Inspirational speaker
A pasal' min: James Scanlon
A tate : Liam, Maya Jean
A nu leh pa' min: Jean Murray, Peter Finnerty