TALIBAN TEN SUICIDE CAR BOMB TAWH KABUL KHUAPI SUAM
April 19, 2016: Tu zingsang nai 10:00 am kiim pawlin Taliban member khatin Afghanistan khuapi Kabul sunga defence ministry building kiangah sihpih car bomb puaksak a, mi 6 a munah si pah in, mi 30 in liamna tuak hi ci'n police ten pulak uh hi.
Al Jazeera reporter Qais Azimy in a bomb puahna mun pen mi tam mahmahna mun hi a, a bomb puah khit a sawt loin Taliban ten ko gamtatna hi ci'n kipulak uh hi Kabul panin gen hi. Kabul hospital spokesman in a liam kibehlap lai dingin a upmawh thu gen a, policete genna panin a kizak danin sihpih bomb puaksak khatin car ah a bomb puak defense ministry building kianga galkap omna ngimna in puaksak hi ci'n gen beh hi. Mit a mu ten a genna ah bomb a puah khitin defense ministry kiangah thau tawite tawh galkapte kikaptuah uh hi ci'n gen uh hi.
Kabul police spokesman Basir Mujahid in bomb puahna munah Afghan special forceste kisawl a, tu-in zong Talibante tawh kikaptuahna om lai hi ci'n gen hi. Presidential Palace in hih bomb tawh kisuamna a mawhpaih thu pulak hi. Taliban spokesman Zabihullah Mujahid in hih bomb puakin defense ministry building nakpi takin siasak hi ci'n Al Jazeera newste kiangah gen hi.
Taliban ten khuakhal hun ciang Afghan galkapte nak suam mahmah se uh a, nung kalin zong Aghan galkapte suam nasia takin kipan ding hi ci'n "spring offensive" kici pulak uh hi. Taliban ten ''spring offensive'' a pulak khit nung Afghan galkapte a suam masakna uh ahi hi. Hih bomb puak in US embassy leh NATO galkapte panmun siasak kha lo hi ci'n US embassy leh NATO military coalition ten pulak uh hi.
Source: Al Jazeera and agencies
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.