SYRIA KUMPI IN DAMASCUS LEH ALEPPO PROVINCE LEILU LAMAH TAWLKHAT SUNG KIKAPTUAH LOH DING THUKIMNA NEI
April 30, 2016: Syria kumpi in Damascus leh Aleppo province leilu lamah tom vei sung kikaptuah nawn lohna ding thukimna (truce) - ''regime of calm'' kici Syria kumpi lehdote (rebels) tawh nei a, ahih hangin rebelste tawh a kikaptuahna munpi uh Aleppo ah neih ding thukim lo hi.
Hih "regime of calm" kici thukimna pen tu zingsang nai 1:00 am pan kipan a, Damascus khuapi nawl-a om Ghouta ah ni khat sung kizui dinga, Latakia mual tung gam tengah ni thum sung kizui ding hi ci'n Syria galkap ten pulak uh hi. Hih munte a kikaptuahna a khawl hangin Aleppo sung tung lam panin Syria galkap ten kap zom zel uh hi. Aleppo province pen Syria kumpi, IS, al-Nusra Front leh rebels ten amau uk zawhna sung teng ciat uk tek uh hi. Syrian Peace Talks a lawhsap khit nungin kikaptuahna kipan kik in, rebels ten Syria galkapte ukna munte thaupi (artillery) leh rocket tawh kap uh a, Syria galkap ten tung lam panin rebelste ukna kapin, khat leh khat kithukkik tuah ngekngek uh hi. Hih kikaptuahna hangin mi 200 valin sih lawh ta hi.
Syria galkap ten Aleppo a kapna ah a nunung pen in rebelte ukna sunga om clinic thum kha a, al-Marja khua ah mi pawlkhat in liamna tuak in, a liamte lakah Siamah khat leh civil defence (White Helmets kicite) khat kihel hi. Tua loin Bustan Qaser leh al-Qoba ah zato inn leh Muslimte biakinn thum deng sia hi. Bustan Qaser ah mi 10 kiim si a, mun dangte ah bel a si kigen lo hi.
Zan in zong Syria galkap ten rebelste ukna district bangzah hiam kapsak uh a, nautang nih si a, a site lakah naungek khat kihel hi ci'n Syrian Observatory for Human Rights in gen hi. UN High Commissioner for Human Rights, Geneva in hih kikaptuahkikna a piang khit nungin Syria galkapte leh rebels ten nautang sih ding khualna nei loin khat leh khat ukna mun kikaptuah uh a, ''war crimes'' in sim theih ding zah dongin nasia hi ci hi.
-The Hindu
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.