ROCKET NGA TAWH TURKEY KIKAP
April 25, 2016: Turkeyte uital vak ISte Turkey in an a kham in pia zo lo hi ding hi ven IS ten amau ukna leitang panin zan in Syria gamgi kianga om Killis province rocket nga tawh vik phei uh a, mi 1 in sihna tuakin, 26 in liamna tuak hi ci'n Turkey ulian ten pulak uh hi.
IS ten hih mun a kap lai takin Turkey Deputy Prime Minister Yalcin Akdogan Killis province a hawh laitak hi a, rocket nih in zing tungin Killis dengin Syria refugee 6 leh Turkey mi 10 in liamna tuak a, nitak lamin rocket thum kilawn leuleu a, mi khatin sihna a tuak banah mi 10 in liamna tuak hi ci'n gen hi. Yalcin Akdogan in January 45 panin tu dong Killis rocket tawh 45 vei a kikapna hita a, zan a si pen tawh gawmin mi 16 a sih banah mi 62 in liamna tuak ta hi ci'n gen beh hi. Turkey in zong a thuk kikna in Syria lehkap phei a, bangci bangin pan kila ding hiam cih tu ni-in cabinet meeting neihna ah thukimna kinei ding hi ci'n gen beh lai hi.
Hih rocket kikapna hangin mipi ten Turkey kumpi'n a kilawm leh kituak bangin pan la lo nuam hi ci'n lungphona nei uh a, police ten hih lungphona neite tui thau (water cannon) tawh kap uh hi ci'n Dogan news agency in pulak hi. A beisa nipi kal sungin Syria-Turkey gamgi a Syria gam sunga IS ten a ukna leitang panin Killis province kap mun mahmah ta uh hi. Killis province sungah Syria galtai mi 110,000 val bang om hi. IS ten a panmun uh laih kawikawi uh ahih manin Turkey in howitzer thaupi (artillery) tawh deih bangin kap man ngei lo hi. IS ten motorcycle zangin gamgi ah va tai uh a, Killis a galkap khit uh ciangin kihemmang zel uh hi ci'n Turkey ulian ten gen uh hi. US leh a kipawlpih ten ISte a dona ah Turkey a kihel manin IS ten Syria leh Iraq gamgi panin Turkey kap thei zel uh a, Iraq leilu leh leitaw-nisuahna lam panin zong Kurdish ten Turkey kap thei zel uh hi.
Source: Al Jazeera and agencies
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.