NORTH KOREA TEN US SPY KHAT THONGAH KHUM KIK
April 29, 2016: Korea gam-a piang US gammi hihna nei Kim Dong Chul in North Koreate' thusim gu-in, thu kan sim hi cih ngawhna tuak ahih manin zanin Pyongyong ah North Koreate' Supreme Court ah thukhenna mai-ah thusitna kinei a, thukhen ten Criminal code Articles 60 leh 64 palsat hi ci-in mawhpaih uh a, kum 10 sung thong kia ding leh nasep haksa mahmah (hard labour) sem dingin thukhenna pia uh hi.
Nung diakin zong US University sangnaupang Otti Warmbier in North Koreate thu kansim hi ci-in kum 15 sung thong kia dingin thukhenna na tuak a, gilbeem ngak lawh hi.
North Korea in US leh South Korea in North Korea kumpi laihna ngimna leh South Korea in Korea tuikulh gam teng uk ding hanciamna tawh thu kante North Korea ah hong sawl den hi ci-in na ngawh mun mahmah a, a hun khop zong manin, thongah na khum khin zo hi. North Korean kumpi'n hih thu kan a matte pen thongah a khum ding hun a bei ma-in a tamzawte na khahkhia zel hi. North Korea in a matte hunkhia dingin US in uliante sawl zel a, 2009 in US President Bill Clinton zong Norh Korea va hawhin China gam panin phalna lai nei loin North Korea gam-a lut a kimante American journalists Euna Lee leh Laura Ling va tankhia hi. November 2012 in zong khualzin bangin a lut Korean-American missionary Kenneth Bae kiman hi. Khualzin mi a kineih mah Matthew Milner kiman kik a, November 2014 in US spy chief James Clapper in va tankhia hi. Matthew Miller kimat hun mahin North Korea kumpi'n a phal loh US khualzinmi Jeffrey Fowle in a tunna hotel ah mi muh ding ci-in Lai Siangtho nusia ahih manin kiman a, thongah kha guk sung kikhum hi.
-The Hindu
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.