AL-QAEDA SENIOR LEADER KHAT SYRIA AH DRONE TAWH KIKAPLUM

AL-QAEDA SENIOR LEADER KHAT SYRIA AH DRONE TAWH KIKAPLUM

April 9, 2016: US ten tuithe vanleng zangin Syria leilu lamah Egypt mi al-Qaeda member lian leh Osama Bin Laden huh ( former aid) a pang ngei Rifai Ahmad Taha kaplum uh ci'n a tanaute leh SOHR monitoring group in pulak hi. Syrian Observatory for Human Rights (SOHR) in a genna ah Rifai Ahmad Taha pen kum 60 mi hi a, Syria gam-a galdo a om US ten tuithe vanleng zangin Pithai (Tuesday) in Idlib province sungah a kaplup uh hi ci'n gen hi.

Egypt ah a om Rafai Ahmad Tihai' tanau ten a zi leh a sanggampa'n a sih thu za ta uh a, Egypt gam-a al-Quada member ten zanin a dahna leh thuakpihna uh lahna nei uh hi ci'n Associated Press news agencyte kiangah gen uh hi. Ahih hangin Washington ah US Department of Defense spokesman Matthew Allen in US ulian ten si takpi mah hi cih thucian kitel lo hi ci'n gen a, US ten bel al-Qaedate tuanna mawtaw kikapsak a, pawlkhat bel si uh hi cih kiza hi ci'n gen beh hi. Hih a kikapna ah kua teng si hiam cih lim takin kikan lai hi ci'n gen beh lai hi.

Rafai Ahmad Tihai in al-Qaeda a zop ma-in Egypt gam-a thau tawite kipawlna Gamaa Islamiya kici ah na pang ngei a, 1997 in Luxor khua-ah foreign tourists mi 58 na that uh hi. 2001 in Syria ah kiman in, Egypt kumpi tungah ki-ap a, President Hosni Mubarak in thongah khum hi. Galkap ten thuneihna hong lak in Hosni Mubarak president panin a kipaihkhiat khit zawh 2011 in kikhah kik hi. Hosni Mubarak in 1995 kumin Ethiopia a zin lai in Rafai Ahmad Tihai in thau tawh a tuanna mawtaw kapin na thah sawm ngei hi. 1981 kum in zong Egypt president Anwar Sadat na thah sawm ahih manin thongah kum 5 kikhum ngei hi. Osama bin Laden in 1980 khit pawlin Afghanistan ah Soviet galkapte dona dingin muhahideente tawh kipawlin al-Qaeda a phut khiat lai-in Osama bin Laden' huhpa in na pang hi. Al-Qaeda ten September 11, 2001 in US a suamna uh-ah mi 3,000 kiim na that uh hi.

-AP