IRAN TEN ARMY DAY PAWI AH S-300 MISSILE DEFENSE GALVAN LAHNA NEI
Aprl 18, 2016: Iran ten Tehran khuapi leilu lamah Army Day pawi a zatna ah Russiate tung panin a lei missile kapkhiatna S-300 missile defense leh radarte lahna nei uh hi. Iran in hih galvan pen Israelte missile panin kidalna ding hi ci'n gen hi. Irante tungah kuamah in galvan zuak ding kiphal lo a, ahih hangin nung kum Luly kha-in US, Russia, UK, France China + Germany (P+1) leh Iran in Nuclear Deal kici thukimna suai a kaih manin hih bangin galvan zuak theih lohna panin gakna (sanctions) Iran tung panin kikhahkol hi. US leh Israel in Russia ten hih S-300 a zuakna hangin Russia a mawhsakna thu pulak hi. Nuclear Deal suai a kikaih ma-in Israel PM Netanyahu in USte kiang hih bangin thukimna suai kai kei un ci'n nakpi takin na dal hi. Nuclear Deal thukimna suai a kikaih khitin Netanyahu hih thukimna pen leitung khangthu adingin hih khialh lian pen hi lai a, Iran in hih hih thukimna suai a kaih palsatin nuclear galvan bawl khawlsan tuan lo ding hi ci'n gen hi.
Hih S-300 missile defense lahna hunah Iran President Hassan Rouhani in hih missile zangin Muslim gamte terrorism leh Israel panin kihumbit ding hi ci'n kamciamna nei a, ahih hangin hih S-300 a kineih hangin gam kiangte patauhna ding bangmah om lo hi ci'n gen beh hi. Syria leh Iraq ah Iran a kigolhna hangin ISte hat ding nakpi takin kidal tuam hi ci'n gen beh hi. Iran gam pen Shia Muslimte tamna hi a, ISte pen Sunni Muslimte hi a, a gumte leh huhna a piapiate zong Sunni Muslim gamte mah ahi hi. Iran in S-300 leina dingin 2007 pekin Russia tawh thukimna suai na kai a, Iran in nuclear galvan bawl hi ci'n ngawhna a om manin Russia in 2010 in hih thukimna na khawlsan hi.
Russia in S-300 sanga hoih zaw S-300V4 na bawl kik a, 2014 in Russian armed forceste zat dingin pia hi. S-300V4 in leitunga medium-range missile khat peuhpeuh kapkhia thei ziauziau a, a hatna (speed) aw (sound) sangin nga vei manlang zaw a, a range pen 400km (249 miles) hi ci'n Tass news agency in gen hi. India in zong Russiate kiang panin S-300 nga lei ding thukimna Russia tawh suai kai khin ta hi.
-ISNA news agency/BBC
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.