BRAZIL PRESIDENT KIPAIH KHIAT SAWM
April 14, 2016: Brazil President leh Worker's Party makaipi Dilma Rousseff in 2014 kumin Brazil gam kiteelna ah sum tampi zang a, sum tampi thelthangsak hi cih ngawhna tuak hi. Hih thu hangin lower house parliament in a paihna dingin (impeachment) Nipini ciangin parliament-ah vote khiatna nei ding uh hi.
President Dilma Rousseff' makaih kumpi (coalition government) sunga kihel right-wing Progressive Party (PP) ten zong zanin nusiatsan uh a, president paihna dingin vote khiatna ah kihel ding uh hi ci'n pulak uh hi ci'n PP makaipipa Ciro Nogueira gen hi. PP in parliament ah member 47 nei hi. President Dilma Rousseff paih khiatna dingin parliament lower house ah vote two-thirds majority kisam hi. Tua khit ciangin Lower house parliament-a vote khiatna tawh vai a siang zawh kei leh upper house (Senate) in a thukimna dingin kipuak ding hi.
Dilma Rousseff' coalition government sunga kihel Brazilian Republican Party (PRB) in zong member 22 nei a, president paihna dingin ka vote-te uh pia ding hi ung ci'n pulak uh hi. March kha in zong Dilma Rousseff in coalition government sunga kihel member tam pen Brazilian Democratic Movement Party (PMDB) in Dilma Rousseff na taisan uh hi.
Zan halin Dilma Rousseff in Vice president Michel Temer pen mipi deihna banga kiteel president laihna ding thu bawl a, kumpi langpang hi ci'n ngawh pong hi. Dilma Rousseff in 2003-2010 kikal datsi multinational company Petrobras ah supervisory chairperson a let lai in zong sum negu hi cih ngawhna a tuah banah 2014 in tukpeng World Cup stadium bawlna sum tampi kinekgukna hangin zong minsiatna lianpi na tuak khin ngei hi.
Source: Agencies
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.