TURKEY AH SYRIAN JORNALIST KIKAPPA SI TA
April 14, 2016: Nipini a Turkey gam sunga om Gaziantep khuapi ah IS ten Syria mi journalist - Halab Today TV presenter Mohammed Zahir al-Sherqat a ngawng kapsak uh a, a liamna hangin dam zo loin zan halin Gaziantep zato inn ah si ta hi ci'n a lawmpa Syrian activist Barry Abdulattif in pulak hi. IS ten ko hong langpangin thu gen hi ci'n ka kap uh hi ci'n Pizing (Monday) in Amaq news agency ah kipulak uh a, nidang pekin thah dingin na vau ngei uh hi ci'n Barry Abdulattif in gen hi.
Mohammed Zahir al-Sherqat pen ISte langpangin nasem a, IS leh al-Nusra Front ten a thah sawmna hangin 2015 in Turkey ah tai a, Halab Today ah sem hi. Syria gamah kiphinna a kipat cil lai in 2011 in al-Bab khua ah Syria kumpi deih lo a lungphona neihna phuankhia in na pang a, tua khit in al-Bad local coordinating committee ah member in zong na pang ngei hi. Tua khitin Syria kumpi lehdo (rebels) Free Syrian Army tawh kipawl Abu Bakr al-Sadiq Brigade kici na phuankhia hi.
Nung kum in Gaziantep khuapi sungah Syrian journalist nih na kithat ngei a, khat a gawl ki-attan sakin, khat thau in a lu kikapsak hi. Hih bangin journalistte a kithahna hangin Reporters Without Borders ten Turkey gam-a Syrian jornalist taite humbitna ding nakpi takin pan la dingin ngetna nei uh hi. Syria buaina hangin Turkey gamah Syriate mi 2.7 kiim galtai in om uh hi.
Source: AP
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.