BANGLADESH AH PROFESSOR KHAT KITHAT
April 24, 2016: Bangladesh ah university a English professor sem, kum 58 a upa Rezaul Karim Siddique in zanin a teenna khua Rajshahi ah a inn panin bus station manawh in lam a pai la-in motorcycle a tuang mi nih - thum kiim in a nung lam panin a gawl tem tawh atsak uh a, tua khit in tem tawh dawt in, sa semna tem tawh that uh hi ci'n police ten gen uh hi. Hih mel theih lohte gamtatna pen a beisa hunin bloggers leh online activists kithahnate tawh kibang hi ci'n police ten gen beh hi.
Police ulian Golam Sackline in mi ngongtatte gamtatna kikan lai a, biakna vai ngongtatte leh Islamic ngongtatte gamtatna mah hi ding hi ci'n gen hi. Rezaul Karim Siddique' lawm ten Siddique in Islam biakna tawh kisai in mi dang Islam gensia a kithat sagihte bangin gensia ngei vet lo a, Islam langpangin zong kampau khia ngei lo hi ci'n gen uh hi. Siddique pen cultural activist hi lel a, ngeina lam tawh kisai puah ding a tangko hi bek hi ci'n gen beh uh hi. Siddique kithahna hangin lungphona lahna in Rajshahi University sangsiate leh sangnaupang ten lungphona nei uh hi.
2013 a kipanin Bangladesh ah Islam kulmut ngongtat ten secular bloggers leh online activists kigawmin mi 7 na that ta uh hi. Feb. 2013 in Pasian um lo (atheist) blogger Ahmed Rajib Haider kithahna a kigolh Ansarullah Bangla Team kici Islam ngongtatte kipawlna a member 8 police ten man ta a, tuate lakah biakna makai lian (cleric) khat kihel hi. Online activist leh law student kum 26 mi Nazimuddin Samad kithahna vai-ah al-Qaeda tawh kipawl Ansar al-Islam ten ko thah hi ci'n SITE ah a pulak hangun police ten Ansarullah Bangla Teamte thah hi ci uh hi.
Source: Al Jazeera and agencies
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.