Nute in hong maisak zo lua

Nute in hong maisak zo lua

Nupi khat puan a sawp kal in a inn uh mei-in kang hi. A puan sawp ma deuhin a lupna vua a Tanu khat bek aneihsun ihmu hi. A puan sawpna pen a innka dawn hi. A pa in kamsiatna tawh sihsan baihlua hi. Pasal nih a inn ngei vua a ki mukhop laitak in tua inn mei-in kang ahih manin tua Nupi kiangah na inn uh kang hilo maw ci-in hilh uh hi. Meiphalh te sam pah uhhi.

A Nu in...maw!..ka tanu mei-in a kang kha de aw..ci-in tai vingveng hi. Mei kuangpi phullet in tai aa, a tanu neihsun hon khia zo hi. A tanu hon khia dingin a taina lam ah a Nu khelguh ki lawi sawnsawn hi. A mel hoihlai mei-in kangsia gawp hi. Hun hong paito hi. Kum tampi a ki teng khin mihau mahmah Nupa taneih theilo ten tuate Nu ta kem uhhi. A tanu pen mihau ten ta ci-in sam uh aa, tua numei no in zong Nu aw.. Pa aw cisak uhhi. A Nu taktak zaw pen Nu cisaklo hi. A Nu taktak nu kiangah na tanu ahihlam ama tungah gen ngei kei in. Na genleh nang leh a tanu adingin hoihlo ding hi cih thupia hihtuak hi.

Numei no zong hong nungak ta hi. Lawm le gual hong neihta hi. A Nu taktak pen amau nasem maimai in kum tampi sung mu hi. Khat vei a lawmte a inn ah hong pai uhhi. Mihau nu kiangah (a nu taktaklo nu kiangah) Nu aw ka lawmte tawh An ka ne khawm ding uh ih na semnu manlang takin na hilh in cihi. A na semnu ( a nu taktak) samin an nong piakma in tui hong pia inla, tua khitteh An hong pia in cih vaikhak hi.

A Nu zong nawh pai theilo a khe baih langlang(a tanu a hot khiat na hang) in pai hi. Tui a piakteh a tanu lawmte khat a na semnu in Tui na buak kha citciat hi. A tanu in a Nu( a nu taktak ahilo mihau nu) sam daidai in enin na nasem nu in ka lawmte tui buak hi ci-in otsan lela hi. A tanu zong mihaute tanu taktak bangin ki zem lela sam hi. A nu in a ki hi ci thei mah hi cihi.

An pia in a Nu taktak pen pai leuleu hi. A tanu inzong a lawmte tawh an ne khawm uhhi. A tanu in a Nu taktaklo mihau nu pen sam aa, Nu aw...hih na nasem nu in ka Antui duh hong bawl henla hong pia hen. Hih hong piaksa te limlo lua hi cihi. A tomin a Tanu in aduh antui a piakleh aom na uh muntoi pian ahih manin a Tanu tongin a Nu tawi Antui khawngkha in tawm buak kha hi. A tanu zong sih heh in a Nu sam hi.

A Nu zong paipah hi. A Nu kiangah enin hih na nasem nupi nu a mel siat taktak tawh mehtui in hong buak kha hi. Hawl khia mengmengin kong cih na theina ci-in a Nu taktaklo pen a dinsa in tai gawp hi. A tai gawp tak ciangin tu phot dihin kong gen ding om hi. Limtak in na ngai in.

Hih Nupi nu pen nidang lai-in a mel hoih mahmah khat hi. A tanu inzong nuihsan hiauhua hi. Ama tanu khat neih in a ih mut kal in a puante a innka uh ah a sawp kal in a inn uh mei-in kangin tua mei kuangpi nawk suak in a tanu hon khia hi. A tanu a hot khiatna lam-ah a kheguh tat kha in tu-in hoih tak in lam pai theilo hi. A tanu a it luat mahmah manin a melsia lawh ban-ah a khezong baihlawh hi cihi. Tua tanu pen Nang hiteh theihta in aw...cihi. A tanu in zong umzo paklo in om hi. Ni dang lai-in picture a ki lakna uh photo te a lahteh a Nu ahihlam um pan hi.

A Nu taktak ahihlam a theihteh kap in kawi hi. Nu aw hong maisak in cihi. A Nu in kapkawm in cik mah hunin nang tungah kong khasia ngei kei hi. Kong it den hi cihi. A Nu in a itzia, a itna hangin mel siat lawh ban-ah gen theihna thuak lawh ahih lam tel semsem hi. Na nopsak ding ahih nakleh gen thei thuak ngam Tuun Nu hi. Na gen theih ding, na cihmawh ding hong deihsak ngeilo Nu hi. Itlo in hai paupau ta lecin hong tel khial ngeilo in na mawhna hong maisak den Nu hi. Hih thupen Zomi Pentecostal Church USA ah Khangno ten Nu Ni in a limlak uh hi aa, Director pen Sia Dal Lam Mang ( Sia Lampi) hi. A taktak in a limlah uh mu lecin uh khitui a luanloh theiloh hi. Gen sawn siamlopi hi mahleng hih sung panin Nu hong itzia, Nu in ei hangin a thuakzia te a phawk thei dingin mimal khat ciat thulak dan a siam hini. Lungdam.

Thawn Tuang

May11,2015

www.zomi-angvaan.blogspot.com