Eden huan a nop ding dan....
Ganhing a lusau he ha khat hong pai Pu Adam in Sakol cih amin na phuak pah aa, a lian mahmah a bilgol pi khat paiphei leuleu Sai cihmin phuak pah, Kii nih a neih a dawn zum zeza khat phei leuleu Sial cih min pia aa, tua mah bangin ni 6 ni-in mihing leh ganhing Pasian in abawlna sungah tua ganhingte amau leh amau a min pia tawmlo Pu Adam in a min phuak ziahziah, min tampi a phuak hangin adangtaak cihlah ki genlo adangtak mahleh zong Eden huan laizang ah tuiluang, singgah a duhleh a duhduh gah zihziah sa lel, amah bek vakvak lel, a sawtsawtna ah a lungleng mawk hi. Gualkhat ci photo ni. Zolai tawh ut bangbang a ki gelh theih mah nuam zungzung ei maw.
Huihlak ah Vasa khat a leng Pu Adam in a muhteh a mindingin Vaphual ci pah hi. Tuni dongin Adam min phuahmah Vasa namkim, ganhing nam kimte Zomiten zatnuam ih sa mahmah hi. Piancil 2:20
Pu Adam zan ih mu, a thawhteh a ngei ah a zi ding Pi Eve numei melhoih khat Pasian in na koih ziau hi. Tua zong nuam ngel inteh maw. Amaute geel Eden huan sungah a duh adeih teng uh Pasianin koihsak zihziah hi. Bang lunggimna ding om peuh mah hiam? A ut ut un om ta leh mihing dang om lo ahih manin guak tangin aom zongun mai zum hetlo in a nuam theithei in om uhhi. Piancil 2:25.
Ka hauh teh, ka pil teh zi neih pan ning aci tangval tam mahmah hi. Kumpi Solomon in a genna ah, "Na nuntakna ding zong masa inla, na an nek ding a kicin ciang bekin na inn ding lamin zi le ta nei pan in Paunak 24:27", cih ki bulphuh ka thei hi. Pilna hauhna zonglo maban neihlo pi-in thubulphuh khawng ki neih kha thei hi. Tua ahih manin Pi teek, Pu teek bek hilo Tangval teek, Nungak teek zong om thei hi. Adam bel tua hilo neih leh lam, pilna zon kulloh a baihsa a zeek dingin ki koih, a zi ding zong mite zonsak kullo ki pia ziau nuam ngello ding hiam?
Itna sum leh paai icih hangin mihau leh mipil tenzong a mel hoih khempeuh na deih khinsamlo hi. Lungsim ki tuak ding, itna laigil neih ding...cihdan tuamtuam tawh ki zong thei hi. Pu Adam tuatawh na buai hetlo a lung nuamsak ding ki ap ziau.
Pute zuu kholh ding, Zin dawn ding om veh aw, tuaten hong sam veh aw, ka laisim ding....cih bang neih sese lo uhhi. Eden huan ah a ki cing takin nungta uhhi. Ki phasak nuam uhleh ki phatsak taaklua zen si ee. Edenhuan zen aw a nop dan ding gen zawhloh hiven. Leitungah tawmkal nungtak pakna ding a bawl zong hih zahin nop cileng, beihun a neih ngeilo Van khuapi zen aw....bang zahin nuam zen ding hiam? A nop dan ding gen vet omlo....
Meitei gun khempeuh laitui a suak phial zongin Eden huan nopna genzo kei ni. Tu-a ka teenna Nasville USA panin khe tawh Zogam mual dawn ka pianna Tuimang khua dong kamgen leng zong Eden huan nopna ki genzo seng kei-inteh. Dr.J.M Paupu cihdan leh, " na hihna hong ki genleh heh ken, na hihna mah hiven, na hihlohna hong ki gen lehzong heh ken, na hihlohna hiven tua hileh tawldam huai pen", acih bangin EDEN HUAN nopna zong gen khit sawm sese keileng tawldam huaizaw. A nop dan ding aw...zen mahmah....
Zolai zuunna in laigelhgelh leng nuam ei.Lungdam.
Thawn Tuang
May 7,2015
www.zomi-angvaan.blogspot.com
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.