0
HEHPIHNA & THUPHA
(Grace & Blessing)
@ Leitung kumpi kiukna nuaiah kumpi deihna bangin gammite lungmuang, nuamsa takin anuntak theihna dingin zuih ding thukhun (law) kinei tek hi. Leitung gam khempeuh in thongkiat theihna ding thukham (Criminal Law) a kibang kim phial, kinei tek hi. Gtn: Mithat, Guta, Mibuan, Zatui zang/zuak, Vankham sem, Mikhem..etc. Hiteng pan a dangteng a pelh zawh hangin khat peuhpeuh hih kha hi leh kiman in thong kia veve ding hi.
...
@ Pasian in Amah a um mite Ama deihna bangin a nuntak theihna ding, Amah tawh kikholh theihna dingin zuih ding THUKHAM 10 hong pia hi.
Tua Thukham 10 sungpan 9 ih zuihzawh hangin 1 palsat lehang mawhna DAN kithuak in Pasian tawh kizopna kitat sakin HELL tung ding thukhen kihi veve hi.

@ Thukham mal khat zong palsat lo in, a vekin a zuizo mihing khat zong om vetlo ahih manin leitung mi khempeuh HELL tung ding thukhensa ih hi hi. Pasian' vangam tun theihna dingin khop gamtat hoih a neizo ki omlo ahih manin Pasian in HEHPIHNA hong nei in a Tapa Zeisu tungtawnin, ZUIHNA tawh ahihlo, UPNA tawh GUPNA hong pia khin hi. En ih sep zawhloh ding Aman hong sepsak ahih manin HEHPIHNA kici hi.

@ Upna hangin hehpihna tawh gupna kingah ta hi. Criminal Law teng hangin HELL ih tun nawnloh hangin tua khialhna a bawlte in leitungah gimna thuak in, a bawllo tein nuntak nuamsa in "THUPHA" sang pah lel uh hi. Thukham (or)Thupha ih cih pen vantunga ding hilo a leitung nuntakna ading ahih mah bangin na hoih na bawl bangbang a met a pung in leitungah na sang ziahziah pah ding hi. Pasian kammal tungah ding ngamin Ama deihna na sep leh Pasian in a THUPHA hong pia pelmawh dinga leitung nuntak nuam na sa mahmah ding hi.

@ Gupna na up leh Pasian tapa za na ngah pah dinga, tuapen na kha vangam tunna dingin kicing hi. Thukham/thukhun pen GUPNA ngah na ding tawh hong kisai sak nawnlo in na zuih zawh zahzah na THUPHA san theihna ding, na thalawh theih ding, na THUPHA (Thaman) dingin Pasian in hong koihsak ahi hi.

@ Ei sep theihloh dingteng HEHPIHNA tawh hong pia a,
ei sep theih ding teng ih THUPHA dingin hong koih sak hi.
HEHPIHNA (Gupngah) ciang bek tawh lungkim kei ni!

 - Gupngah migenthei ut khang ei mawtaw...,
THUPHA (Gamtatpha) dongah kalsuan to ni!
- Thupha suak sawm ngiat ni ei maw...,
Tua hileh ei tung pan Pasian hoihna kimu thei pan ding hi ven...
(JK Kam)
 

Post a Comment

Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.

 
Top