ZRA EC leh PDF Zoland ka muhna

 ZRA EC leh PDF Zoland kamuhna : 

(Rev. Dr. Pau Khan Khai muhna )

Tu sungteng ka lungsim sunga Kawlgam leh Zogam ading thungetna kaneihna pan ka lungsim sunga hong suak leh ka tel mahmah thu pawlkhat hong gelh ka hihi.

1- Zomi te adingin tulaitak anih in thupi mahmah hi.

2- Tulaitak kitel khialhna ding thu leh lai agelh gelh te mailam ah maizum mahmah lel ding cih kician hi .

3- Fake account tuamtuam zangte mailam teh hih kipawlna te in pakta hetlo dinga , maizum mahmah ding uh hi .

4- Bawlung kisui bang hileh ZRA EC pen Full back leh Goal keeper dan hi a, midangten ei sungah goal hong sut lohna dingin amau nasep leh dinmun ahihi. PDF Zoland nasep pen amailam ah midangte goal a sutna dingin ahanciam mahmah laitak ahihi. Anih tuak un Team khat ahihi. Midang te goal ah I sutding athupi mah bangin ei goal zong icin kul cihna ahihi.

5- ZRA EC leh PDF Zoland kikal pen mailam teh igam ahoih leh zong kipumkhat kisam semsem ding , igam asiat semsem leh zong kipum khatna kisam semsem ding hi . 

6- Tulaitak pen lampi sial hun ahih manin sing leh suang nawkkhak hun omthei kha dinga ahizongin lampi ahoih khitteh sing leh Suang aom leh kihemkhia in nuamtakin kitawn thei ding hi .

7- Social Media a apau pau te sangin apaulo a om khikhe mi kitamzaw ahih manin thutak tak hong om leh thungai te khentatna thupi mahmah ding hi .

8-Zomi thautawi kipawlna te in thungetna leh Biakpiakna tawh Amun mun ah ma nongpan manun ilungkim mahmah hi . Zomi te pen anungta Pasian makaihna lo tawh ma kitun thei hetlo ding cih imuh sitset ahihi.

9- Minam dangte kuamah imudah peuhmah kei dinga , kuamah zong isim mawh peuhmah kei ding hi , ahizongin ei leh ei pen cikmah hunin gal leh sa dan leh bawlung sui bang hileh team nih dan in cikmah hunin ingaihsun ngeikei ding hi . Teamkhat ihi a, ipanmun leh i omna akibang lo bek cih phawk den ni .

10- Zomi te pen gam 30 val ah omta ihih manin Topa in minam dang mitam leh mipil te bangin mailam ah hong zat tohtoh nadingin ma ipang khawm liai liai ding hi .

11- Zomi te pen ipu ipa te hunpanin aki it pha deuh leh akithumang pha deuh te ihihi.

12- Zomi te pen akilungdampih phadeuh te ihi a , gamsung pan saman khat om leh zong khua nawl ah ane ding tawh anelo ding tawh amuak khawm liai liai te ihihi.

13- Zomi te gam 30 val ah i om hangin ilungsim leh inasep nopna te i innsung , ikhuasung ipawlpi sung leh i Zogam sung mah ah omden zaw lai hi . 

14- Gamdang a omte akilem kei leh innlam a omte alungkham dinga , innlam a omte akilem kei leh gamlam a omte alungkham ding ahihi.

15- Zomi te pen koi koi ah i om zongin nophun leh dahhun ah akikhen thei leh akinusia thei kuamah ki om peuhmah lo hi .

16- Dawi ibiak lai nangawn in mapang khawm diamdiam te ihihi. Tuni dong akisap na na ah mapang khawm nuam dente mah ihi tawntung hi.

17- Zomi te adingin ki itna in gamgi neilo a, i kizopna tawh tai tampi ah om tale hang aki it pha mahmah te ihihi.

18- Kawlgam sungah Military coup kum 1962 pan ithuak a kuamah mah in galkap ukna nuam asa leh adeih khatzong ki om mahmah lo hi .

18- Kawlgam ah Democracy lampi man tak tawh kum 5 sung bekbek ikalsuan sungin ak lawhsunga kikhuh khahkhiat bangin nuam isa lua a, kei bang USA pan vial 21 kaciahna sunga gamhoih sungin 7 vei bang kaciah kha a anopdan bel maw , gamkhangto te ki eng nawnlo phial mawk ta hi . Adiakin nungak Kumpi nasemte bangin gamdang tangval te ngaihsut in koihnawnlo man ta uh hi . 

19- Gam hoihlo leh kumpi ginalo gam aom kha mawk ihih manin Topa maipha izon ding lohbuang isep theih hong tamhetlo hi. Egypt gam akhel Pasian , Babylon gam akhel Pasian eite Pasian hiven maw ci in tha ilak laitak hiphot hi.

20- Tua ahih manin Zomi Laizom akuama peuh tuibangin luang khawm diamdiam ni.

21- Thukhupna ah : ZRA EC pen gam leh minam kemdingin amau ki piakna hi a izahtak mahmah a tha piak ciat ni . PDF Zoland leh adang Revolution army tuamtuam te zong amau gamhoihna dingin akipia khia te ahih manin izahtak mahmah a tha pia ciat ni . Bawlung kuan khat sunga panmun nih leh thum aomdan in tuat ni .  Ei thapiak ciat limtakin pia in adangte Thapiakna simmawh sak kei ni.

Tulaitak athupitna itel loh hangin denteh ZRA EC leh PDF Zoland ineih khop pen amanphatna leh athupitna itel mahmah hun hongtung ding hi .

Tulaitak hih atunga nih te ka lungsim sunga hong om luat manin agelh ihia , adang thautawi kipawlna tuamtuam te zong thupi mahmah ciat hi hang cih kagen nuam hi.

Hih ka photo koih pen FIFA Zumpi - Zurich a gate gei ah kikoih ahihi- mapan khopna ah gualzawhna om cih lahna ahihi. 

Note adingin thu kongngetsak uh a , den ciangin Zomi leh Zogam ah sunni hong taang ding a , note pen Zomi leh Zogam honkhia te Zogam leh Zomi te akem ahuai te hong kici ding hi .

Note adingin thungetna tawh ,

Rev. Pau Khan Khai 

Louisville, Kentucky 

Feb 28,2023.