A pa in a tapa ading thu tawp a genna

 Pa in a tapate a ding thu tawp a genna 

Zomite in sih kam vaikhak ki thupi sak mahmah hi. Jacob in a hun nunung ciangin a tapate a dingin thu tawp gen a, tangtung takpi hi. Mailam a ding thu tawp a gen taktak pen ih pianna ih pa hi a, pawlkhat in a pa khasia takin leitung nusia sak uh hi. Zomite in ih pianna ih pate sangin ih nu ii pa ih pute ki kihtak zaw in pu zu kikholh ngrkngek a, pute kiangah thupha kingen/kidawhnapi in pate kam a za nuamlo mi tampi om kha liang hi. 

Numei in a nu le a pa, a sanggamte leh a beh a phung nusia in pasal a neih khit ciangin a nungsangte ama innkuan vaihawmpi a suak sak Lai Siangtho sungah muh ding om khol lo hi. Gitloh lamah Athaliah in a nu Jezebel sun a, a tapa a sih ciangin kumpi sem thei dingteng that in Judah kumpi sem a, gilo mahmah zawlai hi. A tawpna ah a pianna a pa (numei pa) Ahab innkuan bangin kisia uh hi. 

A nu tawh pangkhawm a, a zi tawh pangkhawm a, a beh a phung a do leh a langpan pen video sungah muh ding tampi om a, a tawpna kisiacip lel uh hi. Movie ah a sungh pa tawh kido a, a nu ih a pa (a pu) tawh nakpi takin kido a, a kilem tawh a kilem theilo tawh muh ding tampi om hi. Zomite pen sungh le pute thu a hoih a hi a, a sia a hizong pumzuih in kipum gup a, a tapate leh a pa te nusia in a sunghte leh a pute tawh a kingai zaw mitampi om hihang. 

 Pasal kisa mahmah pawlkhat a nu tawh kop in, a zi tawp kop in a pianna a pa a lehdo mi tampi om hi. Melhoih mahmah Absalom in a pa David lehdo a, a tawpna ah a pa galtai liang hi mah leh Absalom leh a pawlte beimang lel uh hi. 

Na pa in na mailam a ding thu tawp a gen ma in na pa lungkim sak in. Na pa lungsim tello pi in na nu lungsim bek tawh na kalsuan suak leh na pa in na mailam a ding thu tawp gen taktak kha ding hi. Isaac in tapa nih bek nei a, thupha khempeuh Jacob piakhin a, Esau a ding thupha khat zong om nawn vetlo hi. 

Kumpi David tapate lak panin Adonijah pen kumpi dingin kimuang mahmah a, Siampite pawlkhat, galkap pawlkhat leh amah a deih mi pawlkhat tawh a pa thudong vetlo in Israel kumpi dingin kibawl tawm hi. Tua ciangin Bathsheba in a pasal David kiangah gen a, David in Bathsheba tawh a tapa Solomon pen Judah kumpi dingin kipsak hi. David tapate Israel kumpi thei ding vive himah leh a pa thu tawp genna tangtung a, a pa a thu simlo Adonijah in thupha ngah vetlo in sihlawh a, Solomon kumpi sem in a pilpen leh a haupen suak hi. 

Tua ahih manin na pa langah pang ngei kei in, na nu in na pa langah a pan leh na pute tawh kikop in na pa lang pan ngei kei in. Na zi in na pa gensia in na pa langah a pan leh na zi pawlpih kenla, na zi bel kei in. Tu lai in pa nusia in, pa khasia sak mahmah in, zi tawh lungkim in sungh leh pu te bel in, pa a langpan leh a khasia sak mi tam mahmah hi. Zomi te in pute pen thu tawp gen sa in kikihta mahmah a, a pa bangmah a mulo tampi om hi. Lai Siangtho sungah pute kiangah thupha dawh sangin pa kiangah thupha dawhna kilimzat zaw a, pa in thupha nei in, thu tawp gen taktak pen nu hilo in pianna PA mah hizaw hi. 

Piancil 27:38

Esau in a pa’ kiangah, “Pa aw, thupha khat beek nei nawn lo na hi hiam? Kei thupha hong pia in, kei zong, ka pa aw,” a ci hi. Tua ciangin Esau a kap hi.

Isaac thupha a ngah Jacob in zong a tate a dingin thu tawp gen na hi bangin nei hi. Piancil 49 na sungah kim hi.

 Tua ciangin Jakob in a tapate sam a, “A hong tung ding hunte-ah note’ tunga hong tung ding thu kong gen theih nadingin note hong kikhawm un. “Jakob’ tapate aw, hong kikhawmin za unla, na pa Israel’ thugen ngai un.

 

1 Reuben

 “Reuben, nang pen ka ta upa, ka vangliatna le ka tacil na hi a, a kiphasak pen, a vanglian pen na hi hi. Tuihual bangin na kip kei ding a, na tungtuang kei ding hi. Bang hang hiam cih leh ka zi na luppih a,

ka lupna na mindaisak hi.

 

2 “Simeon le Levi, unau hi a, a hiam uh ngongtat nadingin a zang uh hi. Amau’ kikhopna-ah ka kihel kei ding a, amau’ pawl tawh ka kizom kei ding hi.

Bang hang hiam cih leh a heh manun mi that uh a,

kiphatsakna lungsim tawh amaute in mawlpih dingin

bawngtalte’ zagui a sattat uh hi. Amau’ sinsona lauhuai a, amau’ hehna kihtakhuai hi. Samsiatna ngah ta uh hen! Jakob suante sungah amaute ka khenthang ding a, Israel sungah amaute ka thehthang ding hi.

 

3 “Judah aw, na sanggamte in nang hong phat ding hi.

Na galte’ gawl na meek ding a, na sanggamte na mai-ah hong kun ding uh hi.

4 Judah pen humpinelkai tawh kibang a, a sa matsa a nek khit ciangin a kua-ah a ciahkik tawh kibang hi.

Humpinelkai bangin kizia-in a lumsuk hi. Kua in amah

phawng ngam ding hiam? Judah in kumpi ciangkhut

len tawntung ding a, a suan a khakte in zong

ukna aana nei tawntung ding hi. Minam dangte in

ama tungah siah puak ding a, zahtakna tawh

ama mai-ah kun ding uh hi. A sakolno leenggui-ah khih a, a lano leenggui limci penah khih hi.

Amah in a puante leenggahzu sungah sawp a,

a puansilhte leenggahtui san sungah a sawp hi. Leenggahzu a neknekna-in a mit san gega a,

bawngnawi a neknekna-in a ha pak hi.

5 “Zebulun, tuipi gei-ah teng ding hi. Amah, teembaw khawlna mun suak ding a, Sidon ciang dongah

a gamgi om ding hi.

6 “Issakhar, a hat la tawh kibang a, vangik nih kikalah a lum hi. A tawlngakna mun hoihsa a, a leitang noptuak sa hi. Tua ahih ciangin van pua dingin a liangko niamsak a, sila bangin na kisemsak hi.

 

7 “Dan in Israel minam dangte mah bangin a mite thu khen ding hi. Dan pen lampi-ah gulpi hi ding a, sul gei-ah gulgu nei hi ding hi. Sakol’ khetul petin a tuang pa a nungkiat hi. “Nong hotkhiat ding ka ngak hi, Topa.

 

8 “Gad pen a buluhte in buluh ding a, ahih hangin amah in amaute sulzuih kik ding hi.

 

 9“Asher’ lo-ah an tampi piang ding a, amah in kumpi anlimte bawl ding hi.

 

10“Naftali, a kikhah sakhipi hi a, sakhino suakkhiasak hi.

 

11“Josef, a gah pha hiang ahi hi. Ciktui gei-a om a gah pha hiang hi a, a hiangte kulh tungah zaam hi. Thal tawite in nakpitakin amah simin, amah thal tawh kap uh a, nasia takin gimsak uh hi. Ahih hangin ama thal ling loin om a, a khutte kizaptelsak hi.

Jakob’ Vanglian Pa’ khut (Israel Suangpi, Tuucingpa’ min), nang hong huh ding na pa’ Pasian in tunga om vantung thuphate, nuai-a tuithukna sunga om thuphate, khawilevulh le tuletate, nangma tungah hong pia hi. Na pa’ thuphate pen tawntung mual liante’ thupha, tawntung mual neute sangin

vanglian zaw hi. Tua thuphate Josef’ lu tungah

hong tung hen la, a sanggamte’ kiang panin

a kituam koihpa’ tungah hong tung tahen.

 

12 “Benjamin, a ne bakbak keivom hi a, zingsangin a sa matsa ne-in, nitakin a ngahsa teng hawm hi,”

a ci hi.

Hihte khempeuh pen Israel minam sawm le nihte ahi hi. Hih thute pen amau tawh a kituak ciatin a pa in amaute thupha pia-in a gente ahi hi.

Jakob’ Sihna le Kivuina

Tua ciangin Jakob in a tate thuhilhin amaute kiangah, “Kei, ka mipihte kiangah a kigawm ding ka hita hi. Kivui nading munin neih dingin Abraham in Hit mi Efron’ tung panin a lo tawh a leikhop, Kanaan gam, Mamre nisuahna lamah a om Makpelah lo-a leihawm, Hit mi Efron’ lo-a leihawm han sungah ka pate tawh hong vuikhawm un. Tua lai munah amaute in Abraham le a zi Sarah vui uh hi. Tua lai munah amaute in Isaac le a zi Rebekah vui uh hi. Tua lai munah keimah in Leah ka vui hi. Lo le tua sunga om leihawm Hit mite’ tung panin a kilei ahi hi,” a ci hi. Jakob in a tapate thuhilh a man khit ciangin, a lupna tungah laitat a, a nunung pen a hu sang-in ama mipihte kiang a zuan ta hi.

Na pa a sih ma in a maitang ah a kamza dingin hun ngah sawm in. Gamdang om na hih leh zong sum tampi bei in na pa kiangah ciah vingveng in. Na kiangah na pa a om theih kei a, a om nop kei leh zong na pa a lungkimna munah om sak lel in. Na pa hong kam vaikhakna munah

na pa vui inla, a guhte phum in. Pasian thu um Israel te in pakamvaikhak leh a kampau nunungte thupi sak mahmah uh a, thupha ngah takpi uh hi. 

@NK. Nang