Pu Cin Khan Thang @ David Thang' Tangthu Tom

Mangpha! Tawntung Na Tawldam Ta In! R.I.P Pu Cin Khan Thang @ David Thang, Hamburg, Germany.

Pu Cin Khan Thang @ David Thang' Tangthu Tom

Pu Dam Kam ( Ngaihte) leh Pi Dim Za Niangte' sung pan 25 March, 1943 kumin Zogam, Mauvom khua ah suak hi. 1957 State Primary School Mauvom pan tan (4), 1957 -58 State High School, Tedim tan (5), 1958 -1960 State High School Hakha pan tan ( 6-7) zo a, tua hun pan Hakha Sangmang Robert G.Johnson leh Siapi Van Gyi tawh kitheikha hi.

Tua panin 1962 State High School, Tedim ah tan ( 7 - 8 ) 1962 - 1963 kum sung Taungoo, SDA High School pan tan (9) sinin tua pan acidamlo ahih man ciahkikin SPS Mauvom ah sangsia sem hi. 1963 -1964 kum teh Monywa, State High School No.2 ah tan (9) sinkik hi. 1964 - 1965 kum ciang'n, Burma Nany Yatanabon Naval Base ah Training kha (6) sung akah khit teh Buma Navy sungah kum (1) sung Tui galkap sem hi. 1965 - 1966 kum teh Yangon tungsuk a tualaitak America/USA siikzum palaipipa ( USA Ambassador Henry A. Byrd) kiangah kiangah nasep anget leh piapah ahih manin US Embassy, Cooperative Section, Yangon ah semkha a, Zomi lak pan US Embassy ah nasem masa pen hipah hi.

April, 1967 kum teh Kawlgam pan Thailand ah paiphei hi. Thailand, American galkapte' zum phualpi ( US Military Assistant Command Thailand/ US Military Advisory Group, Thailand, 29th Signal Group of The US Army, Radio Communication, Assistant Supply Coordinator) munte ah nasem ngei hi. Bangkok atuncil lai-in American numei galkapte Uniform tawh amuhcil hi a, muhnopsa mahmah hi. Bangkok atuntungin American Baptist Missionary te'n zongh panpihin huhna tampi pia uhhi. Tua hun pen US President Johnson hun ahihi.

1974 kum tak ciangin, United Nations High Commissioner For Refugees Mr. Otto Gobius deihsakna tawh UN Head Quaters pan UN Card ngah hi. Zomi lak ah UN Card angah masa pen hipah hi. Thailand, Bangkok khuapi ah a om sungin Zomite' tangthu ( Zo History) kan/research bawlin laibusaal/library khempeuh ah pai koikoi hi. 1975 kum ciangin Bangkok pan Germany gam Dr. Vumson te' omna Hamburg khuapi tung hi. Hamburg khuapi atunzawh asawtlo-in factory/setzung khat ah nasem hi. May, 1986 ciangin Germany gammi hihna ( German Citizenship) ngah hi. 1992 kumin nasep nasep khawl a, 1993 -1996 ciang'n Electronic Technician sinkhinzo hi.

October, 1997 kum teh lungtang damlohna/heart attack ngahin bypass (2) vei bawlin ki at hi. Germany, Labour Department panin Unemployment benefit (damlo khasum) ngah hi. Azi masa pen Mrs. Khomkhai (Thai) tawh tanu (1) nei uhhi. A tanu Mss. Rungcinda Somboonsuk ( B.A) leh azi Bangkok, Thailand ah om uhhi. Kum 2004 teh a German lawmnu Mrs. Ursula Korber in kalnatna tawh nusia khinzo hi. September, 2007 kumin Stroke natna/ pumzaw ngahkik a, October, 2009 kum ciangciang heart-attack bypass (2) vei, Stroke natna (1) vei, ngah ahih manin akigawm (3) vei bang ki at/ operation kibawl ngei hi.

Apianpih pau Zopau simloh namdang pau nam (6) bang ahi, (1) Falam pau, (2) Haka pau, (3) Kawlpau/Burmese, (4) Thai pau, (5) German pau, (6) Mangpau/English cihte pauthei, simthei leh atthei hi.

Zomi sungah manglai tawh Zomite'tangthu akician mahmah Dr. Vumson' gelh Zo History cih laibu zongh Thailand, Bangkok ah a omsung laibusaal/library tuamtuam pan thukantelna/research abawlna pan amuhkhiat thu tampi te Dr.Vumson' tungah apiak/hard copy ahihi. Abeisa kum (10) lai 2009 kiim akipan laibu manpha mahmah khat ahi Zopau - Mangpau Dictionary ( Awsuah/phonetic kithuah) laimai tul (1000 val pha) gelh akipat mankhinta a, Calcutta khuapi, India pan hawmkhia/publish ta ding cih ahihi ( Pu Cin Khan Thang @ David Thang tawh Internet E-mail pan ka kithuzaak nunungna Jnauary, 2019).

*Theih ding*: Hih Pu Cin Khan Thang Nuntakna Tangthu Tom pen amah leh kei internet/E-mail pan ka kiho thuzakna tungtawn vua amah ngiat in ama mimal tangthu agelh/Autobiography teng Mauvom Khua Tangthu Leh Bethsaida AG Mauvom Pawlpi, Silver Jubilee Magazine AD 1987 - 2012 laibu ah kisuaksaksa teng tutung aman/Pu Cin Khan Thang @ David Thang in ateenna Hamburg khuapi, Germany pan leitung nusiata cih dahna thu ka zak teh ama thupitna leh na manpha asepte mipi tampi in thei leh cih lunggulhna tawh kong suahsakkik ahihi.

By : Bob Tuangpi ( 01192019)