Leitungbup Zomi-te Minam Khawmpi

ZIC2019KL THU KIMNATE (ZOLAI) 1
Leitungbup Zomi-te Minam Khawmpi

Zomi International Conference (ZIC2019KL)

17-19 February, 2019
Kuala Lumpur, Malaysia

KHAWMPI THUKIMNATE (CONFERENCE RESOLUTIONS)
ZOMI VERSION

Gam leh Minam Thubulpite (Strategic Issues)
1. Zomi Identity:
(a) Leitungbup Zomi-te Minam Khawmpi (Zomi International Conference – ZIC2019KL/ Khawmpi) sung ah ih minam min in "Zomi" a hihna kikipsak hi.
(b) Abeisa hun sungin ih minam min dingin ih minam min taktak ahilo min tuamtuam in hong kiphuahsak in hong kiciamteh hi.

2. Zogam leh Zolei (Territory):
(a) Zogam (Zoland) in pupa khang a kipan akiluahsuk, Zomi-te ten’na gam leh leiteng, mun leh mual (Zomi inhabited area) khempeuh huam hi.

3. Political Goal:
(a) Zomi-te in ei leh ei kivaihawm theihna (Self-Determination) bukim ih ngah theihna dingin lunggulhna kinei hi.
(b) Ei leh ei kivaihawm theihna (Self Determination) a kingahna dingin United Nations Organization (UNO) thuneihna leh phalna nuai ah Zomi Parliament (Zomi Innpi) phuh dingin kithukim hi.
(c) Zomi Parliament phuh ding thukimna pen Khawmpi Thupulakna (ZIC2019KL Declaration) bawlin in kitaangko ding hi.
(d) Zomi Parliament phuh zawhna dingin Khawmpi avaihawmpi Zomi Innkuan USA (ZIUSA) kipawlna leh India gam pan Zomi Council (ZC) pawlpi, Myanmar gam pan Zomi Youth Association (ZYA) kipawlnate in madawk in ma ahong pangkhawm dingin thu kipia hi.
(e) India gam lam a Zomi Movement mabante ah madawk in ma apang, Zomi pawlpite sung a buainate manlang takin a vengbaih dingin Khawmpi in kilunggulh hi.
(f) India gam, Mizoram Gamkee sung a Zomi-te in Sialkal Range Development Council (SRDC) kivaipuakzia tawh ei leh ei kivaihawm theihna dinmun hong ngah uh ahih manin Khawmpi in lungdam pihna kiciamteh hi.


4. Economic and Social Goal:
(a) Zogam leh Zomi sung ah kum 5 pan kum 10 sungin khantohna bukim a om theihna dingin, Khawmpi a kah kipawlna tuamtuamte in, ei ma dinmun tek panin limtak in ma pangin, gam leh minam vaite hawmkhop dingin kithukim hi.
(b) Zogam leh Zomi-te sung ah minam buppi huam (National Level) in gam leh lei, khua leh tui khantohna ding mabante a kipatkhiat theihna ding ma pankhop dingin kithukim hi.

5. Peace and Security:
(a) India gam sung a om Zomi-te sung ah ei leh ei kivaihawm theihna leh bitna a omna dingin United Peoples Front (UPF) pawlpi hanciamna, mapanna leh nasep nate hoihtak leh picingtak in a hong zopsuak theih ding uh kilunggulh hi.
(b) Zomi Re-unification Organization (Eastern Command) in Zogam sung ah bitna leh daihna a omna dingin a mapanna uh pha kisa a, Myanmar gam sung a om Zomi-te in ei leh ei kivaihawm theihna (Self Determination) a ngah zawhna ding ngimna tawh ma a hong panna dingun kilunggulh hi.
(c) Zomi Re-unification Organization (Eastern Command) pawlpi in, tu hun laitak a Myanmar gam ki-ukna leh kimakaihna tawh kisai khuahun luanzia (Political Environment) tawh kituak in pilvang takin ma ahong panna dingun kingen hi.

Tulaitak a Minam Mabante (Current National Issues)

1. Thukhunpi (Constitution):
(a) Tu laitak a Myanmar gam kumpi in Gambup Thukhunpi (2008 Constitution) puahphatna leh behlapna (Amendment) bawl dingin a hanciamnate hih Khawmpi in kithukimpih hi.
(b) Myanmar gam sung siksan in Zogam Thukhunpi (Zoland Constitution) khat gelh dingin kithukim hi. Zogam Thukhunpi agelh dingin Zoland Constitution Drafting Committee pen anuai a bangin kiseh hi.
(i) Convener : Pu Go Sawm Khup, Zomi Innkuan USA
(ii) Member : Sia Pau Sian Lian, Ph.D. (Candidate), Japan
(iii) Member : Pu Kham Lam Tuang, Zomi Congress for Democracy
(iv) Member : Sia Golan Sianzamung Naulak, Ph.D. (Candidate), India
(v) Member : Sia Mung Lan Thang, Myanmar
(vi) Member : Sia Cin Khan Lian, Myanmar
(vii) Member(s) : Zomi Members of Parliament, Myanmar


2. Zomi MP-te leh Minam Party:
(a) Zogam leh Zomi a khantohna dingin Zomi MP-te (Members of Parliament) hanciamna, mapanna leh nasepnate Khawmpi in kitheihpih a, lungdamna kiciamteh hi.
(b) Khawmpi akah dingin akisam Zomi MP-te sung panin Zomi Congress for Democracy (ZCD) Party panin MP (4) hong kah uh ahih manin Khawmpi in lungdamna kiciamteh hi.
(c) Zomi min tawh minam picing khat hihna kipsakna leh ciaptehna ngah theihna dingin Myanmar Gambup Kisimna Ciaptehna (2014 Census Result) pen Kisimna tawh kisai thuneite in manlang takin ahong pulakna dingun Zomi MP-te in ma ahong panna dingin kingen hi.
(d) Tu laitak in ZCD Party pen Zomi-te Minam Party khatin kisang ahih manin, Party kivaipuakzia leh kimakaihnate tu khang hun a, a khangto Party-te kivaipuakzia leh gam makaite dinmun tawh kituak in enkik, sittel in, a kilawmlo, a puahphat huai kivaipuakzia leh kimakaihnate, gam leh minam itna takpi tawh kipuahphatna, kilemtuahna, kikhelna ahong bawlna dingun minam min leh vang siksan in kingen hi.

3. GZA Kipawlna leh Minam Kipawlna Dinmun:
(a) Global Zomi Alliance (GZA) kipawlna in a ngimna leh a dinmun tawh kituak in gam leh minam thu tawh kisai in Siampi dinmun (Prophetic Role) panin ma ahong lak uh pen Khawmpi in kilawm kisa hi. Zogam leh Zomi tawh kisai vaite ah Siampi dinmun panmah in ma ahong pansuakna dingun kingen hi.
(b) Khawmpi thukimnate a taksuakna ding, Khawmpi thukhensatna leh vaihawmnate a tangtunna dingin GZA kipawlna in thukimpihna hong pia in, Siampi dinmun panin thupha ahong puakna dingun kingen hi. Tuamah bangin, Zomi-te biakna/sahkhua pawlpi khempeuh in zong thupha a hong puakna dingun kingen hi.

4. Zomi Nam Ni:
Kumsim February 20 ni in Zomi Nam Ni (Zomi National Day) pen Zomi-te ten’na khua khempeuh ah "Zomi" min tawh a kibawlna dingin hanciamciat ding kihanthawn hi.

5. 2020 Myanmar Kiteelpi:
2020 kum Myanmar Gambup Kiteelpi (General Election) ciangin Zomi sung pan MP Candidate dingin taangpi in adeih pen, Zogam leh Zomi a itngiat, pilna leh siamna kicing anei mite (qualified persons) bekmah in Kiteelna ah kuang ahong luina dingun kideih hi. Tua banah Zogam leh Zomi a phelkhamlo ding Zomi-te bekin kuang ahong lui ding ki lunggulh hi.

6. District:
(a) Myanmar gam sung ah Gamkee leh Gambuppi dinmun (State and National Level), Kumpi tutphah tuamtuam ah a tu thunei Uliante (Officials) in ama mimal hamphatna, ama khua leh tui adingbek khual in thu leh lai vaihawm a na asep uh pen Khawmpi in kimawhsak hi. Tulaitak a Kumpi za angah NLD Kumpi in, abeisa hun sung in Chin State sung a District bawlna leh gamgi khenna pen gam kivaipuakzia a kilawm a kituak zaw dingin khuallo in, amau mimal, khua leh tui khatpeuh aituam hamphatna ding siksan in a geelna, a sepnate uh Khawmpi in
uang kisa in kimawhsak hi. Gam kivaipuakzia a khantohna dingin, Chin State sung a Tedim, Tonzang, Cikha, Khaikam leh Rih khuapite gawmkhawm in District khatin a ding theihna dingin kideih hi.
(b) India gam, Manipur State sung ah Lamka District a piankhiatna dingin Khawmpi in kideih hi.


7. Zogam Leiteng leh Gamgi:
(a) Myanmar gam sung a leitang tawh kisai thukhunthak bangin, Zogam ah leitang awng (Vacant, Virgin or Fallow Land) cihbang om peuhmahlo hi cih thu Khawmpi in kikipsak hi. Zogam sung ah leitang awng cihbang omlo a hihna thu thunei kumpite tung ah thu kipuak ding hi. Zogam sung mun khatpeuh leitang awng in ciaptehna leh vaihawmna a om aleh Khawmpi min tawh thukimlohna thu kibawl ding a, lai kiphah ding hi.
(b) Zogam sung ah a omsa pupa gam leh leitangte, mipi deihna omlo in, kumpi thuneihna leh thagum hatna suangin thumanlo tak a kisuhna, a awng hi ci in kilaksakna cihte pen Khawmpi in hoih kisalo a, kisang theilo hi.
(c) Zogam leitang leh gamgi vai tawh kisai in thumanlo tak a vaihawmna a om leh Khawmpi min tawh ahi zongin, taangpi thuneihna tawh ahi zongin, lungkimlohna thu kipuak ding a, a kisapna zui in thu neite tungah lai kiphah ding hi.

8. Gam Khantohna (Infra-structure Development):
(a) Zogam sung ah gam khantohna lianpite (Infra-structure Development) tawh kisai in taangpi muh theih dingin kumpi thuneite leh teelcing Zomi MP-te (Elected Representatives) in a hong lahkhiatna ding, melmuh a hong bawl dingin Khawmpi in kingen hi.Gentehna: Myanmar National Grid, Behiang Trade Center, etc.
(b) Haimual Khuathak a om Border Trade Center kituah sawm cih thu kigalzak ahih manin, Khawmpi sung ah lunghih mawhna kipulak hi. Hih Border Trade Center tuah ding vaihawmna a om a leh Khawmpi in thukimlohna kipuak ding hi. Hih thu tawh kisai in Zomi MP khempeuh in mawhpuak in la in, Khawmpi lunghih mawhnate ahong vaanna dingun kingen hi.

9. Zomi Galtaite:
(a) Lamkaal a om Zomi Galtaite (Refugees) dinmun tawh kisai in Zomi Innkuan USA kipawlna in a vaanpihnate hangin Khawmpi in lungdamna kiciamteh hi.
(b) Lamkaal a om Zomi Galtaite gamnuam ah a peemtak theihna dingun, thu luanzia leh thu omzia zui in, ZIUSA kipawlna mahin madawk in hong vaan a, maban ahong zopsuakna dingun Khawmpi in kingen hi.
(c) Azenzen in lamkaal a om Zomi Galtaite in amau teelna zui in, pianna gam a ciahkik sawm uhleh, a kilawm a kituak in inn leh lo, annek tuidawn leh nuntak khuasakna ding mabante a neih theihna dingun, Zomi MP-te in ahi zongin, Zomi Youth Association (ZYA) leh Tedim Youth Fellowship (TYF) kipawlnate in ahi zongin, Sia Cin Khan Lian (Aar Yone Oo) in ahi zongin, ahi theizah in a panpihna dingun Khawmpi in kicial hi.


10. Minam Dialkhai/Puanlap:
(a) Zomi-te in Minam Dialkhai/Puanlap (Flag) kician khat neih dingin Khawmpi in hoih kisa hi.
(b) Zomi-te minam dialkhai/puanlap dingin Zomi Re-unification Organization (ZRO) pawlpi’ dialkhai/puanlap pen zat dingin hoih kisa a, Khawmpi akah kipawlna tuamtuamte thukimna tungtawn in kipsak dingin hoih kisa hi.

11. Meitei Singnuaimite leh Zavom:
(a) Zogam sung ah galvan tawi, namdang singnuaimite a omlohna dingin Khawmpi in kideih hi.
(b) Zogam sung a om Meitei Singnuaimite in Zogam sungah mun leh mual a hong lak uh pen Khawmpi in kilungkimlo hi.
(c) Zogam sungah Zavom ciinna a beina dingin Zomi-te khua leh tui kipawlnate (CSOs) in a thu a la kicing takin kankhia in, kumpi thuneite tung ah Zavom ciinna deihlohna thu pulak ding kisam kisa hi. Zomi khua leh tui kipawlna tuamtuamte in makaihna la in, taangpi in Zavom deihlohna lungphona leh nialna bawl dingin kihanthawn hi. Taangpi deihna leh lungphona zui in, Zomi MP-te in kumpi thuneite kuppih in, Zogam ah Zavom a kiciin lohna dingin vai ahong hawmna dingun kingen hi.

12. Zomi Numeite:
(a) Gam leh minam, khua leh tui tawh kisai vaihawmna, mapanna khempeuh ah, Zomi numeite in pasalte tawh liangko kikim in panmun aneih theihna dingun vaihawmna dingin Zomi kipawlna khempeuh kihanthawn hi.

13. Zo Tual Lai:
(a) Zogam sung ah Zomi Language and Linguistic Research Institute kician khat neih zawhna dingin kilunggulh hi.
(b) Zomi-te in minam picing khat a hihna tawh kituak in Zo Tual Lai (Script) pen limtak in kepcing dingin Khawmpi in hoih kisa hi.

14. Zogam Tuiphum Pawlpite:
(a) Zogam sung a om Tuiphum Pawlpite in, kamphen akullo Zomi khempeuh in minam min khat suangin kalsuankhop dingin a lunggulhna thu uh Khawmpi in kithukimpih hi.

15. Nah Tah Hla Nasepna:
(a) Myanmar Gam Kumpi pan Nah Tah Hla zumpi (Border Affairs Ministry) vaihawmna tawh tagah naupangte pilna siamna sinna dingin Zogam sung ah a kihong Sangte ah Kumpi thuneihna zangin (State Sponsored) Buddhism biakna sinsak (Teach) in azuihsak (Practice) sawm uh pen Khawmpi in dik kisalo a, kilungkimlo hi.
(b) Hih thu tawh kisai in Global Zomi Alliance (GZA) kipawlna in Zomi pawlpi tuamtuamte tawh pangkhawm in Zomi tagah naupangte ahong vaanna dingun kingen hi.


16. Zomi Community Center leh Library:
(a) Zogam khuapite ah Zomi Community Center leh a hoih mahmah Library tuamtuam a kineih zawhna dingin Khawmpi in kilunggulh a, Zomi gam makaite leh Zomi kipawlna makaite tung hih thu ahong vaanna dingun kingen hi.

17. Zomi Khangnote:
(a) Zomi-te khua leh tui vaite ah madawk in ma apang dingin Zogam sung a om khua khempeuh ah Zomi Khangno Kipawlna (ZYA) a kiphuh zawhna dingin hoih kisa hi.

Chairpersons

( Sd xxx) 1.. Chin Sian Thang, MP

(Sd xxx)
2. John Khatthang Ngaihte

(Sd xxx)
3. Go Sawm Khup

(Sd xxx) (Sd xxx)
4. Kam Suan Mung 5. Kap Za Khup

Recording Secretaries

(Sd xxx) (Sd xxx)
1.Tual Khan Suan 2. Golan Suanzamung Naulak

(Sd xxx)
3. Ngo Sian Pau

Panelists

(Sd xxx)
1. Gin Kam Lian, MP

(Sd xxx)
2. Kham Khan Thang,
MP

(Sd xxx)
3. Pau Sian Lian

(Sd xxx)
4. Hang Khan Lian

(Sd xxx)
5. Cin Khan Lian

(Sd xxx)
6. Dr. Lam Khan Piang,
Professor

(Sd xxx)
7. Mung Lan Thang

(Sd xxx)
8. Khamsonlian Joy Ngaihte

+ 57 Participants