Kilawmzaw leh Kilawm (2)

1. 

KILAWMZAW LEH KILAWM (2)

 1. Zomi Nam Ni: February 20 ni-in Zomi nam ni a hi thei khempeuh in a mun a mual i tenna ciatah kizang ding hi. Hih bang ni ciangin ei inntek semte'n i thupi ngaihsut leh mite'n hong thusimsak ding a, en i thupisim kei leh midangte'n hong neumuhsak ding hi. Hi bang ni ciangin a kilawm mahmah in kizem linlianin hunzatna siangtho takin i zat ding thupi hi. Ni thupi hi bang i neih ciangin hundangah zu leh sa a zang mite nangawnin i minam zahtakna tawh kidawm takin i om ding deihhuai hi. Ka tenna uh Guwahati khuapi ah milip 16 million khawng dingin kituat hi. Zu zuakna mun khempeuh ah om koikoi a, ahi zongin zu kham kimu lo hi. Zu kham kitawng cih bang a beisa kum 20 ka ten sungin na mu kei hi. Mite'n a kham khak uh ciangin midangte nawngkaisak kha ning cih lau ahih manun inn ciah vingveng uh hi. A zu kham hoih sa ka hi kei hi, a dawn ciatciat a kilawmzaw a gamtat ding deihna hi.
(adsbygoogle = window.adsbygoogle || []).push({});
 2. Mimal Min: Gamdang i tun leh gamdangte min pakta mahmah pah leng kilawm kasa hi. Mikang min peuh min neu in hong nei i tam mahmah khin zo hi. Lai Siangtho min ahih leh Mikang min hi tuan lo hi. Mikang min i zat ding leh a kilawmzaw deuh om kasa hi. Tua ciang Lai Siangtho min i zat ding leh zong a kilawmzaw deuh om hi. Gentehna in kum khat sunga kha 12-te min bang min in i neih ciangin kilawm lo zawdeuh kasa hi.
(adsbygoogle = window.adsbygoogle || []).push({});
Ko kiangah Khasi minamte'n zong Mikang kam a zak peuhpeuh uh tawh a tate min na phuak uh hi. Ka lawmte khat bang a pa mistry (lettamah) sem hi a, a zat tawntung "kahlei" (ladder) leh "sek" (hammer) te a tate minin bulh ziau hi. Khatpa leuleu ahih leh mawtaw hawl (driver) hi a, tapa a neih masa pen "First gear" cipah, a nihna pen "Second gear" ci hi. Min kilawhna Mikang kam i la zongin a kilawm deuh ngaihsun ni, tua mah hong kilawmzaw ding hi.


 3. Man tawh kisai: (Photo), Man zong ahih theih bangin misi koih lo ding, amau a damlai man koih ding i cih hong phatuam mahmah khin zo hi. Sa-sung, sagil bawl lai cih khawng zong hong tawm mahmah ta hi. Midangte ma'n (photo) zong ciamnuihna in zatsak kei leng hoih dingin ka um hi. World-Cup lai bang, Ronaldo, Messi cihte pawl man a kilawm loin kizang kasa hi. Hong thei le-uh, a koihte sum tampipi liau theihna ahih lam i theih ding deihhuai hi.
(adsbygoogle = window.adsbygoogle || []).push({});
Mikangte'n a zat mahmah uh "defamation charge" ka min hong daisak, a thu om loin hong simmawh cih tawh legal action hong bawl le-uh, i nuihpak nading a hih hangin i liau ding hong tam mahmah kha thei hi. Kikem leng hoihzaw dingin ka um hi.

J.M Paupu
(adsbygoogle = window.adsbygoogle || []).push({});