Vantampi Pua In Hongciah Uh.

Tonzang Myonee ZCD Party Pan Amyotha Hluttaw ading teelcing Pi Cing Ngaih Mang hong ciah leuleu hi. Hluttaw kikhak ciang in MP te hong ciah den uh a, amipihte uh hong van uh hi. Pu Gin Kam Lian leh Pu Kham Khan Thang zong hong ciah khin uh a Hluttaw Budget hawm ding vai aman siang khit uhciang in, Hluttaw 17 Oct 2017 kihong kik ding ahihman in Mipi Aitang in ih sawlna mun Naypaytaw lam zuanzuan ta uh hi. Tua Hluttaw kikhak sung in Pu Chin Sian Thang zong hongciah a, Kawlpi pan kileh hi. Ahang pen Zogam lampi sia lua mahmah in ama cidamna leh kum in zokei khaleh ci in hong ciahtoh suak ding lem kisa lo hi. Pu Cin Khan Pau zong nihvei hong ciah hi. Khat vei Hluttaw Budget vai hi a, anihveina Khuano Cup vai ahihi. Tu a Pi Cing Ngaih Mang zong nihvei hong ciahna hi-in amasa pen Hluttaw Budget vai hia, tua pen Ministry of Construction lamte hong ciahpih ahihi. Ama ih constituency ahihman in zinvai ama vaipuak ahihi.
Hluttaw kikhak sim in MP te hong ciahden hi. A mau sum tawh hong ciah uh ahihi.

MP te hongciah ciang in Zogam, Zomi ading nahoih semlo in nasem kuankik ngeilo uh hi. Hluttaw Budget bek thamloh khua tuamtuam ahausate tawh kimu un, a kisamte van khawm uh hi. Sanginn, Lampi, Mei, Tui, etc Kumpi tungah  angette uh Copy la in tampi tak puasuk den uh hi. " Ko kong piak theih lianh aomloh hang, a kisai zum ah na gensak ding hi ungh" ciden uh hi. State Level panzong Pu Pau Lun, Pu Thang Khup, Pu Suando Cin, Pu Thawng Khua Mang ten ih Gam ading a sep theih zahzah uh hong sem ziahziah uh hi. Zomipiten khangtohna pen mitsit kal ahong pai sakha ih hiam, khangto lua nuam zaw ih hiam kiphunphun kha hi. MP te Dahpa Khuang guan leng zong aphun ki omlai ding hi. Bangbang hi leh 2020 ciangdong tua MP teng thapia in thungetsak ni. Ei ahte, Ih tangmite  Ih lang pangpang leh ei sum zaw ding hihangh.

Oct 12, 2017
Ministry of Construction zumlam Ulian Pu Kyaw Linn( ေဆာက္လုပ္ေရး ဒုဝန္ႀကီး), Pi Cing Ngaih Mang leh Ulian tuamtuamte  Cikha dong pai uhi.
Tuabek thamloh Tedim zong Sozang lam pelhna Galpi nihna lampi ahi Thuamvum zong en ding uhcih hi

ေဆာက္လုပ္ေရး ဒုဝန္ႀကီး pan 2019 kum October kha bei ma in Zampi lamka pan Tualkhiang khua dong lampi suang lampi kongphah sak ding uhhi. Zampi, Tuimang leh Haiciin khuathum teng pen khuasung tengah kattazar kongzut sak ding uh hi ci-in kamciam pia ci hi. Tualo zong omlai ding hi. Pi Cing Ngaih Mang tungah Zomi Mediaten na dong un, maikha Voice of Zomi ah hong suaksak ding hi ungh.

Abeisa hun un Ministry of Construction pan 2020 ma in Tedim to Cikha kattazar kong pia ding uh hi cikhin cih Pu Kam Lian tung pan kiza hi. Indo-Burma kikawmna Lampi zong India Kumpi in Kapteel lam tawn ding 2019 kumsung sep ding cih thu Ministry of Construction mah pan kiza hi. Tulaitak Phindung Lampi zong teng4000 valtawh kipuah hi. Dalkhai leh Nahlan kijawmna , Gamnih Kizopna Lei zong asawtlo in kilam ding cih Tonzang GAD tetung pan kiza hi. Tuilang pan Tuithang kikal zong kipuah hi. Lampi, Sang, Mei, Tui etc Zogam ah kipuah zihziah hi. Ih genkhak loh tamzaw lai hi. Hun khatteh akim in suaksak ni.

Gamdang Pilna Sin, Sumzong Mipil Mihau Tuailai Zosuan Ngalliamteng  zong Van tampi pua in hong ciah ding uh a, Zogam hongzun ding uh hi.

Lungkia vet ken Zomi!

Lungdam
Cin Lian Khai(Zogamkhaino)