Dotna: Na minpi leh na minneu nong gen photphot dia ?
Dawnna: Ka minpi Nem Khan Dim hi in ka minneu Dimpi hi.
Dotna: Na Nu' min leh na Pa' min zong hong genmai ve leh
Dawnna: Ka Pa' min Pa Lian Khaw Mang leh Ka Nu' min Nu Thang Do Zen hi
Dotna: Aw unau bang zah pha na vua nang e abang zahna ?
Dawnna: Unau 8 pha ung in kei a 7 na hi'ng
Dotna: Aw na khualui leh tulaitak na omna zong thei nuam lailai siing e leh
Dawnna: Mualbem leh Yangon (Hliang township) hi
Dotna: Aw kawlgam sung ah na sangkahnate nong gento mai dia ?
Dawnna: BSc. Computer Science (Dagon University, Yangon, 2008)
MSc. Computer Science (University of Yangon, 2011)
Dotna: Gamdang sangkahnate e leh ?
Dawnna: Doctor of Engineering (Human-Computer Interaction, 2016, Kochi, Japan)
Dotna: Eh hei ! Khauhpai ei ! Na sangkahnate a na major te nong loto samsam mai diam ?
Dawnna: Bachelor (Computer Science) - Software, hardware, programming
Master (Computer Science) - Software, hardware, programming, projects
PhD (Human-Computer Interaction)- Humans, computers, interfaces, research
PhD research - Assistive interfaces for people who are blind (mit khuamulo te zat theih computer/smartphones/assistive device te koicih bawl ding)
Dotna: Lunglut huai thei mahmah ven assistive interfaces for people who are blind (mit khua mulote' bawmta vante) na cih pen lunglut huai deuh saveng aw. Bang ciang tungta ahia ? Kizangh theita maw ? Mizawng daipam te'n a zangzo dia?
Dawnna: Assistive interfaces te pen, PhD dissertation sungah ka propose interfaces teng pen international scientific journal 3 leh conferences 4 ah hong ki publish ta hi. IEEE (Institute of Electrical and Electronics Engineers) conference khat ah zong the best community research paper award khat na ngah ing. Tua idea te mah zanga company te in a van te uh hong bawl tohtoh ding ki lamen hi. Tu ciang ciang bel kei mahmah in Text Reading software khat (Japan lai in) na develop Khin ing. Hih assistive interfaces tawh kisai pen (mitkhuamulo te a ding bek a hilo) Kawlgam leh Zogam ah zong na tampi sep ding om lai ding hi.
Dotna: Kalamawk ! Mittawte' vanzat dingte bawlkhiat zia ding amukhia himawk ve cia mataw. Bang na cih leh hih bang idea hoih ngah thei mawk na hia leh angtang lawmlawm mah si hang e ?
Dawnna: PhD program ka kipat ding laitak in, ka PhD research ding pen mite ading phattuamna khat teitei a behlap khat hi ding cih ka lunggulh mahmah hi. Ka research ading literature reviews tampi ka hih khit teh disability (poina) a nei mi te in a dang mi cidam te zah in technology zang kha lo, phattuamna ngah lo cih ka phawk kha a, Assistive research bawl ding ka lunggulh na hong khang semsem hi.
Dotna: Zolia khat in hih bang thulianpi nong muhkhiat pen lungdam in angtang mahmah hang ei. Ih Zogam leh kawlgam ah hih na muhkhiat thute tawh bang khawng sepding sunmang na nei a leh ?
Dawnna: Amasa ah bel disability (poina) a nei naupang te'n a khangual naupang te tawh a kibang a pilna a sin theih nading uh lunggulh pen ing. Gentehna, a khe a zang theilo naupang te'n inn pan pilna a sin theih nading online based education (internet tungtawn a laisin theihna), khut a zang theilo, mit khuamulo naupang te a ding voice - based systems(Awging tawh lai sintheihna), leh a dang tampi.
A nih na ah, Gambup level ading ka sun mang :)- mikhempeuh (disability a nei/neilo) i gamtat theih na mun, mi khempeuh i zat theih van te ih lam theih, ih bawl theih nading infrastructure hoih neih ding. Gentehna, building khempeuh in wheelchair tawh pai theih na lampi (slope) nei ding, elevator nei kim ding, elevator ah button te pen wheelchair tung tuang khat in zong a bat/a zat theih hi ding, lamkanna yellow lines te ah mitkhuamulo te zat theih ding sound notification te nei ding, leh adang tampi.
Dotna: Kalaisai ! Nong gen teh ka mit bang keuh hanhan ei. Na gente hiluazen ei. A kisamh vive hi.
Khai leh ! Ih thukawng hei vat ni in na sangkahnate a na subject te lak pan nuam nasak mahmah leh haksa nasak mahmah te bang hi peuhmah ahia leh?
Dawnna: Nuam kasak pen - programming hi in,
Haksa ka sak pen - Human-Computer Interaction hi.
Dotna: Ahih leh gamdang ah sang na kahna ah bang khawng nuam salo in bang khawng nuam nasa a leh ?
Dawnna: A nuam lo - Gamdang pau (Japan pau) a kisap mahmah laitak deih banga ka pau theih loh
A nuam: Experiences (ka sin ngei loh, ka tuah ngei loh tampi sinkhak/ tuahkhakna)
Dotna: Japante' thupitna bang khawng om nasa a leh ?
Dawnna: Tavuan lak ding te ah lathei/lazo (accountable), gamtat hoih (disciplined)/ kikemzo uh sa ing
Dotna: Tulaitak sang akahlai khangnote' tung ah na gen nop a om dia ?
Dawnna: Lai siangtho sim in. A gualzo mi/sangnaupang suah theih nading thusim khempeuh lai siangtho sungah om hi. Na hun zatsiam in
Dotna: Amen ! Hilua ei. Aih leh kong dotding bel kisuang peuhmah veng in hong dong kei leng lah tangval te'n hong maisak zolo ding aih teh hong dong mai leng, khan tawn kitenpih ding na pasal ding in kuate dan deih na hia leh ?
Dawnna: Pasian' ompihna a nei, hong it siam
Dotna: Lungdam lua ei. What about your philosophy of life ? (Definition of life according to your philosophy) nuntakna ih cih pen bangci ngaihsut na hia leh ?
Dawna: Life is a service in where we are meant to be. I nuntakna in Pasian hong koih na munah, mite' phattuamna i hihna hi
Dotna: Hi lua si ! Na motto (na dinpih thu) e leh ?
Dawnna: Life is short and kindness matters most. - I nuntakna tomno sungah dikna leh thukhualna mah thupi pen hi.
Dotna: Hilua mahmah ei. Laisiangtho bulhphuh deuh cih khawng e leh na nei hia?
Dawnna: Laisiangtho bulphuh cih bel tu ciangciang nei lian keng. Nisim Lai siangtho pen a bantak in sim lel ing. 2011 khawnga kipan bel study ka hih ding sim in Paunak (Proverbs) chapter khat ta a tuam in simzel ing.
Dotna: Tuazong zongsatna hoih khat hi e. Laisimte' tung na gennop a om lai dia ?
Dawnna: Pilna sang sin nuam Zomi khangno te ngaihsutna (idea) piakna a kipan panpih theih ding a om leh hong panpih nuam hi ing. Hanciam mahmah ni.
Lungdam mahmah ei leh. Na sunmangte a gahsuah zo ding in Pasian in hong siam hen la cidamna leh khansauna thupha hong pia hen o.
Pu Mung Len Thang ( Thangbawi)
Fb; Pu Pu Thang tung panin ki la sawn hi.
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.