Zomi Innkuan USA, Inc.
Executive Committee
Date : August 02, 2016
Dahna Pulakna : Mangpha Tg. Langh Sawm Kim @ Kimpu Kum (37)
USA gam, Oregon State, Portland khuapi a teng Tg. Langh Sawm Kim @ Kimpu, Thatmun beh, Kum (37) in abeisa August 1, 2016 ni-in Portland khuasunga Zato minthang khat ahi Adventist Hospital panin gilsunglam damlohna hangtawh mual ong liamsanta cihthu izakmanin Zomi Innkuan USA kipawlna in nakpitakin kidahpih, kilainatpih mahmah hi.
Tg. Kimpu pen Zogam, Tedim uksung, Heilei khuami, kawlpi ateng Pa Zel Za Cin leh Nu Tel Ngo Cing ten Tapasal 4 tanumei 4 a neihnalakah a upen 4na hi-in Tg. Kimpu pen leitung nuntak khuasakna, sumzon paaizonna a nuamzawding lunggulhna tawh a beisa 2008 kumin USA gam ongtung ahihi. nasepna khempeuhah citak mahmah, mipawlnuam mahmah khat leh Zomi tangval melhoih mahmah khat ahihmanin hicibanga khangdawnglai pi a mual ong liamsanpen pammaihsa leh I phalnai het kei hi. ahizongin ei mihingte ongbawl ongnei i Pa Pasian gelnabanga na khempeuh apiang ahihmanin ithuaksiamtekdingzong I kideihsak hi.
I sanggampa Tg. Kimpu pen USA leitang tunga ong nusia Zomi khat ahihna tawh kizui-in Zomi Innkuan USA kipawlna in Zomi sungah unausanggam khat, laizomkhat sikhat sakhat hihnahanga lainatpihna, dahpihna lahna in Paakkual khattawh Mangpha khakna kineiding hi.
I sanggampa Tg. Kimpu tawh a nunungpen hunzatkhopding pen ongtungding August 03, 2016 (Wednesday) ni-in Omega Funeral & Cremation Service Chapel Hall 223, SE 122nd Ave, Portland, OR 97233 ah zingsang nai 11:00am hun-in Zomi Bethel Church pawlpite makaihna tawh anunungpen hunzatkhopna, hehnephunbawlna kineidinga tuakhitciang 2:00pm hunin 400 SW Walters Dr, Gresham, OR 97080 ah vuina/ daitansakna kineiding hi.
I sanggampa Tg. Kimpu ongnusiatna hanga adah akap Inn leh gam muntuamtuam pana alunglengkhuangai pianna nulehpa sanggam laizomteng leh khuapihtuipih tanaumeltheih behlehphung a kuamapeuh tungah ibiak Vanglian Pasianin amakiangpana ongpai a khasiangtho hehnepna bucing ongpiaksak henla aluang khituite ong nulsakin lungnoptawldamna ongguan kimciat tahen cih Zomi Innkuan USA kipawlna in thu kongngetpih uhhi.
Dahpihna lianpitawh
Executive Committee
Zomi Innkuan USA, Inc.
August 02, 2016
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.