Minam it ih cih pen Meekuang lui pah ding, Naakzang lei bawl pah ding, Zogam lampi puah pha pah dingin Tedim sangpi a thak lam pah ding cih zong hikhin pah sam lo hi. Tuate na sep zawh leh hoih sem a, na sep zawh kei lezong nang sep theih tampi om hi. Gentehna in:
- Biakinn sung leh Zomi pawipi te ah Kawllai Mangla cihte na sak se sangin Zola mah na sak tangtang pen na minam na itna hi.
- Kawl ansai ah anlimzaw phial mah taleh Zomi Ansai ah an na neek a tha na va piak tangtang pen Minam na itna hi. Tua mah bangin van na lei ding veve a hoihna kibang tektek Zomite vansai pan van na va lei sese zong Minam na itna mah hi. Zomi leh Zomi mah cia kideihsakna tawh a hoih pen leh a kiman thei pena vante ih kipiak zong Minam itna khat ahihi.
- Midangte lakah kizumpih se lo a Zomi khat leh khat pen unau banga Zopau mah pau in ih kikholh a ih kiho tangtang pen Minam itna mah ahihi.
- Zomi vaia sum kikhonna te ah na piak zawh zah tawh na va kihel tangtang pen na minam itna hi in thupi hi. Tuamah bangin sum a khon te'n zong ama mimal phattuamna ding beka zangh lo in, a kizatna ding mun mantak ah a zat pah pen a minam a itna mah ahihi.
- Zolai na gelh ciangin zong a malgawm mantak a na gelh tangtang pen na minam na itna hi. Zola na sak ciangin zong Kawl awkaih Mang awkaih a sa se lo in Zomi awkaih mah a na sak tangtang zawk pen na minam na itna ahihi.
- Zomi Nam Ni leh Zomi ni thupi nite ah Zopuan mantak na silh tangtang pen na minam na itna hi. Zopuan ut bangin a kipuahkik gawpte pen Zomite Ni thupite ah ih silh loh a, minautang te'n Tangcin puan ih silh loh zong ih minam ih zahtaakna leh ih itna a kilatna ahihi.
- Sangnaupang na hileh a pil pen mah hih sawm inla, nasem na hileh a siam pen mah hih sawm in. Tua in minam na itna kilangh sak a, na minam a tawi sang na hi gige hi.
- Ei Zomi ten ih nampuan ut banga ih Design gawp loh zong ih minam leh ih ngeina ih zahtaakna khat ahihi.
- Zomi ih hihna tawh ih Zolapi te ih sak diahdiah a ih thupitsak zong minam leh ngeina itna mah ahihi.
Zomi Quavadis
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.
EmoticonClick to see the code!
To insert emoticon you must added at least one space before the code.