Ei' lam pan-a pan theihna ombangbang-a mapanna akila laaitak hi-a, kuakua-in bangbang agen zong-in adiak-in Malaysia-a Zomi sisanpih teng-in thungetna-ah I-hel tangtang maiding ahihi.
Gam thumna hongpuak zuahzuah keiphial zong-in Malaysia-ah abit, akhamuanhuai khuasakna akineih nading napi-in thupi-a, aniampen tua dinmun beek I-ngah nading thungending hihang.
Gam thumna tungsate khenkhat-in olgen mahmah (ciah ziauding)-peuh acih ziauziau hang-in bangteng-tawh kikaai-awk cih mikim-in mulo hizaw-in, ciahziau abaih phialzong-in masuan bingcip ahihi.
Ciahding lemmah khading ahizong-in, mi' hauhna leh anlim tuilim aciam khinsa khat ciahkiik-in bangmahlo-tawh akipat kiik ciang-in lungziinna leh lungneuna thuak-thei uh-a, ataangpi khamtheih leh zu-tawh kidiah-in kisuklupna (suicide) nangawn piangsak-hi.
Social exclusion leh depression akici pangpá kisakna leh lungziincipna-pen hihbang dinmunte-ah tamdiak-hi. Mi khenkhat lawhcing-in khualehtui zuan uh-a, adang khenkhat ahihleh "inn atung mialmial" -in ciah uhhi. "Inn atung mialmial" te ataangpi lungneuna-in dawntuah pah-a, kuamah-in "miginalo" cilo pipi-mah mite-in ginalo-a amuhding dahna, khasiatna leh thangpaihna hongkhang-hi. Tua ciang-in ahoihlam kalsuanna-tawh haanciamna sang-in khamtheih leh zu lam-ah kiheina, lungsim dammawhna leh kisuklupna ciangdong atung-uh ahihi.
Zomi zatam adiak-in akisulum pahliang kei zong-in lungziinna innkuan sung-ah khat-in avei man-in innkuan buppi dammawh sak-hi. Adiak-in kisuklupna-pen khangmoi te' lak-ah hi phadiak-a, khangcingte leuleu thu tampi ngaihsut ziak-in kisulum saamlo himahleh innkuan cina cip-in lungziinna mah-tawh nuntaakna abei toto ahihi. Hih sa-nuazuui siatnate ngaihsun lopi-in "Ciah ziauding hi-ei" hongci ziauziaute adammawh ahihman-in khasiatna-a laak lohding, I' mapanna (Thunget)-mah zom ciatciat-a Pasian' sung-ah lametna koih ngiatding tha kipia nuamhang.
Zomi Association of Malaysia-tawh mapang khawm-a Laiphah Gualhna-zong akizo hita-a, Malay Zomite' limkaih mapanna bek akisamlaai ahihman-in hun tomno sung-in ana mapang ciatding kong haanthawn-hi. Pasian-in seplah neilo-hi.
Malay Zomi akuamapeuh kizasak sawnni!
Gaaltaai peemta-mah,
Zokhai
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.