US DIPLOMAT LUI PA'N US IN ASSAD LAIHNA DINGIN AL-NUSRA FRON-TE ZANG CI
May 5, 2016: Russian Foreign Minister Sergei Lavrov in Syria buaina vensakna dingin US in palai dingin a zat ten al-Qaeda tawh kipawl al-Nusra Front ngongtatte bukna pia hi ci-a a ngawhna pen man mah hi ci-in US diplomat lui Jim Jatras in Sputnik newste kiangah gen hi. Jim Satras in Syria kumpi leh Syria kumpi lehdo (rebels) ten Aleppo ah ceasefire thukimna a neih sungun US in al-Nusra Frontte bulh ding sik khedap pia (huh hi a cihna) ci-in zanin gen hi. Jim Jatras pen Republican party senatorte foreign folicy adviser sem lui ahi hi.
US leh Russia in Syria ah ceasefire hun sot toh lai ding kikupna a neihna uh-ah US ten Aleppo province sunga ceasefire thukimna ah al-Nusra Front ngongtatte zong huam khaksak ding deih uh a, ahih hangin Russia in amau pen leitungbup in Islamist ngongtat kipawlna in ciamteh ahih manin kisang thei lo ding hi ci-in nial hi ci-in Russian Foreign Minister Sergei Lavrov in zanin Sputnik news ten a interviewna ah gen hi.
Jim Jatras in US President Barack Obama in Islamist ngongtatte gamtatna gum den a, Obama' vaihawmna (Obama's administration) in Islamic kipawlkhawmte gamtatna pen USte gal lian pen hi a cih uh hangin Syria president Assad laihna dingin hihte zang den uh a, Obama in Assad laih ding a hanciamna khawlsan nai lo hi ci-in gen hi. ISte Syria a nidang sangin nakpi takin thanem zaw ta uh a, Assad ukna suakta lai ding hi cih Obama leh a nungzui ten a muh hangun Russia in Assad kilaih ding a thukimna dinguh lamen lai veve uh a, lu khu sung panin bilpi lakkhiat sawm teitei lai uh hi ci-in gen beh hi. Assad kilaih mawk leh Syria ah kumpi gina om loin buaina nasia zaw sem piang ding hi cih US thukham bawl ten tel nai lo lai uh a, Assad hangin Islamic ngongtatte gamtatna kibehlap in, buaina tam zaw hi cih ngaihsun lailai uh a, NATO makaihna tawh Libya kumpi kilaihna hangin buaina nasia takin tu dong om den napi Obama leh Hillary Clinton in lawhcinna bangin ngaihsun lai ta zen uh hi ci-in gen beh hi. Jim Jatras in US in Syria gam-a moderates kicite (rebelste a genna) vanzat bangin nei in, Assad laih ding hanciam uh a, ahih hangin hih 'moderates' kicite Aleppo ah al-Nusra Front tawh kipawl uh a, tu-in US in al-Nusra Frontte zat beh lai hi ci hi. US gam-a makai lian tuamtuam ten (Iraq a US commander lui Army General David Patreaus kihel in) US leh al-Qaedate a kipawl ding deih beh lai uh a, USte pen gamnuaimite uk zo bangin a kingaihsut hangun Turkey, Saudi Arabia leh Gulf gam (Middle East gamte) ten a deih bangbang un a uk uh hi zaw a, Syria buaina pen Sunni Muslimte biakna hanga buaina hong suak taktak ding hi ci-in gen beh hi.
US kumpi in Syria gam-a moderate opposition (rebels) kicite leh al-Nusra Front ngongtatte a kipawl lam uh lim takin thei a, ahih hangin mipi muhna ah a thei lo kineih uh hi ci-in CIA counterterrorism officer lui Philip Giraldi in zong Sputnik newste kiangah gen hi. Philip Giraldi pen terrorism do dingin a makai ahih manin terrorism thu tawh kisai kanin gamdangah kum 20 val a hun na zang hi. Phillip Giraldi in moderates rebels kicite leh al-Nusra Frontte a kipawlna thu pen thu lamdang hilo a, US ten sum leh training a piak hih moderates rebelste pen a kizatna meel uh om loin a min hoihna dingin Islamic ngongtat IS, al-Qaeda leh al-Nusra Front ten Syria galkapte a kapnate uh amau kap bangin gen uh hi ci hi. US in rebelste leh al-Nusra Frontte kipawlkhopna thu lim takin thei uh a, ahih hangin politics vai hangin hihte pen pawl tuamtuam hi pawng cih uh hi ci-in gen beh hi. Syria a rebels ten Syria galkapte hangsan takin do hi cih pen mang a kiman hi lel hi ci-in Phillip Giraldi in gen hi. Russian Foreign Minister Lavrov in Syria kumpi langpang ten al-Nusra Frontte bukna pia in, huh hi a cih pen a man mah hi ci-in Phiilip Giraldi in a thugen khum hi. .
-Sputnik
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.