US IN THAHATNA LAHNA DINGIN ROMANIA AH RAPTOR NIH LENGSAK
April 26, 2016: US Air Force ten Russiate Ukraine buaina ah kigolh hi ci'n ngawh in zan in Romania ah a thahatna uh lahna (show of strength) ci'n F-22 Raptor fighter jets nih Romania ah va lengsak vava se uh hi. Hih vanlengte Romania leitaw-nisuahna lam a teembaw kingakna Black Sea a om Mihail Kogalniceanu vanleng phualah bawhsak uh hi. US in F-22 Raptor vanlengte ah huih lak pan huih kapna (air-to-air) galvan ten kikap ciangin na ma thei khol thei dinga, a kap ciangin a hawl ten a kapsiatna dingin a vanlengah sensors kithuah a, lei lam zong kap thei hi ci'n gen uh hi.
Romania gam gen milip million 19 pha a, 2004 in NATO member in pang hi. Ukraine gamah Donetsk state ah minam pawlkhat in Ukraine kumpi ngongtat in minam deidan tuam nei hi ci'n a rebels ten suahtakna ding ngen uh hi. Russia in hih rebelste gum in, Ukraine gam tuamtuam sim sawm a, Europe gam tuamtuam zong lak sawm hi ci'n US leh NATO in ngawh pong hi. Ahih hangin US leh NATO in Europe gam tuamtuamah ah galkap a koih beh nuam in, Ukraine gam pen NATO member ding deih in leh galphual in a zat nop manin hi zaw hi. US in Ukrainete tungah galvan a zuak nuam manin sum bawlna dingin ngian zongzong a, galvan tawh zong huh in, sum zong tampi basak ta hi. 2015 kumin Ukraine in gam tuamtuamte tungah leibat $ billion 128.9 tak nei a, Russiate sum a batte zong pia nuam lo hi.
US Ambassador Hans G. Klemm in Russiate khauhpai (aggressive) manin Europe gamte, NATO gamte leh South Eastern-Europe gamte Russiate panin kidalna dingin nakpi takin pan kibehlapsak sawm hi ci'n gen hi. US in hih F-22 Raptor gal vanleng nihte pen NATO gam kipawl a collective security leh Europe kiimah buaina om lohna ding dalna ding ngimna tawh Operation Atlantic Resolve kici a kineih manin a kilengsak hi a, zan nitak lamin kiciah kik sak hi ci'n gen hi.
Russia in a gup 'Russia-backed separatists' kici ten April 2014 panin Ukraine galkapte na do uh a, hih buaina hangin mi 9,100 sih lawh ta hi.
-The Hindu
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.