"Never say Never" (Hanthotna tomno)

Na hih theihzah tel inla, kimangngilh bawl pah in! Ong genkik ning, nuntak hunsung ih cihpen tom lua hi, thu mawkmawk ngaihsutna tawh mawk bei sak kei ta peuh in. Joel Budd in "Ding khia inla gamlim khengin kuan khia in" na ci liang hi. Mihing te'n ih ngaihsutna zah khengval in na kisem thei hi, ahizongin a tamzaw in ih ngaihsutna zah sangin a tawmzaw bek kisem mawk hi. Na kipat phot loh in na sep theih zah bang ciang hiam cih na thei kei ding hi.

Oscar Wilde in a genna ah "Na limlim a hoih khom ciang bek ih sep pen mawhna lianpi hi. Ih sep limlim ahoih penpen ding mahin sem ciat ni" ci hi. Na lungsim sungah "Hithei kei" cih kammal paikhia in.  Na lungsim sungah "Kei hih zawh tua ciang bek hi" na cih a, na kineusek ngeingei leh tuazah val na sem zo ngei kei takpi ding hi. Tua ahihmanin na hihtheih zah tel inla, kimangngilh bawl pah in a ci ih hihi ! Topa Zeisu in kei tawh hi peuh leh a piang thei lo om lo hi, mual zong na khiin thei ding uh hi ci hi!

J.A. Holmes in hibangin na gen hi:
Khangno te zaakna ah "Piang thei lo ding hi" cih kammal pau khia kha ngei kei in. Bang hang hiam cileh khangnote lakah tua a piang thei lo dinga na upmawh a piang sak thei dinga Pasian sehsa na om khinkhian kha thei hi. Tua pa/nu pen leitung in kum za tampi ih ngakngak na hi thei hi! Mi lungneu sak ngei kei in....ci hi.

John Ruskin in a genna ah "Never leh Impossible cih kammal ka zaakna ah gen kha ken, za nuam keng" cigiap hi. Amah pen mi lawhcing suak pah lel hi! Na sunmang na neusak ngeingei leh leitungin nang hong zah lo ding hi. Na mailam hun ding na theih nop leh na omna panin ding khia inla kalsuan khia in. Tuipeek na siam nop leh bang hangin tuidaina munah kileklek ding na hiam? Tui thukna ah paisuk ve, siam pah ding naive! Leitungbup a lokzopa, tangthu thak a gelhpa na hih ding hanciam in, na pai ngeilohna munah pai inla, mite phak nailohna mun va pha in! A gualzo na ut leh lamtawp dong na tun kul hi. Singkung zong adawn a tungte bekin a gah limci penpen ne kha uh hi.

Latomno khat tawh hong khup dih ning:
"A kiloklo tuipi tungah gunkuang tawh ih pai hangin,
a nopna tam lo hi!
Mi khempeuh sep theih en zong ih va sep pen,
a nopna tam lo hi!
Bang hiam a nuam pen?
Zo dinga ih kilamet loh ih zawh mah,
haksa penpen taleh nuam penpen hi."

-By Francis Lamthang (Zomi Quavadis)