ARMENIA LEH AZERBAIJAN IN CEASEFIRE NEIH DING THUKIMNA NEI TA
April 6, 2016: Azerbaijan leh Armenia galkapte Nagorno-Karabakh kiim a kituhna hangin ni li sung nasia takin kikaptuah uh hi. Hih kikaptuahna hangin mi 46 kiim in sihlawh man hi. Azerbaijan galkap ulian ten a beisa ni nih sungin Armenia in a huh thautawite (separatists kicite) tawh kikaptuahna hangin Ajerbaijan galkap 16 leh nautang khat si hi ci'n gen uh hi. Armenia pen Christian gam hi a, Azerbaijan pen Muslim gam ahi hi.
Azerbaijan sunga province/state om Nagorno, Karabakh leh province 7 Separatists kici thau tawi ten suahtakna ding ngen in Armenia kumpi in huh hi. Azerbaijan galkapte leh Amrmenia galkap leh separatistte kipawlin ni li sung a kikaptuah khit ciangun zan sun (April 5) 12:00 (0800 GMT) a kipanin kikaptuahnawn lohna dingin thukimna (ceasefire agreement) kinei thei ta hi ci'n Azerbaijan Defense Minister in pulak hi.
Armenia kumpi'n huhna a piak Nagorno-Karabakh a thau tawi ulian ten Reuters newste kiangah a genna ah thau ka lot nawn lohna dingun thu hong kipia hi ci'n gen hi. Hih Nagorno-Karabakh kiim-a buaina ven'sakna dingin zanin Austriate khuapi Vienna ah kilemna ding thugenna nei uh hi. Russia leh US in Armenia leh Azerbaijan galkapte a kikap nawn lohna dingin kunh a, ahih hangin Azerbaijan kumpi gum Turkey in Azerbaijan in ni khat ni ciangin a leitang khahsuahsa tenguh ngah kik ding hi ci'n kamciamna nei hi.
Hih buaina mun Nagorno-Karabakh pen mual tung gam hi a, a tamzaw pen Armenia singtangmite teenna ahi hi. 1991 in Soviet Union gam tuamtuam in a kikhen khit nungin hih munah buaina kipan a, 1994 in Russiate vaihawmna tawh 'ceasefire agreement' na nei uh a, ahih hangin buaina dai tuan lo hi. Hih mun suahtakna ding deih thau tawite (separatist armed force kicite) pen Yerevan kicite leh Armenia in huhna pia in, Nagorno-Karabakh independent republic ci'n suahtakna a pulak hangun kuamah in thukimpih lo a, Armenia kumpi in zong thukimpih beek lo hi. Hih buaina hangin mi 30,000 kiim in sihlawh khin zo hi. A beisa ni li sung buaina kipat kikna hangin galdo dingin Armenia singtangmite tampi kipiakhia (volunteers) uh a, separatist armed force kicite tawh kipawl dingin Karabakh province ten amau khuapi dinga a pulak uh (self-declared capital) Stepanakert ah separatist kicite omna zuan uh hi.
-Agencies
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.