AFGHANISTAN GALKAPTE LEH TALIBANTE KIKAPTUAH
April 18, 2016: Nung kum Sept. kha-in Taliban ten tawl khat sung a lakna uh Kunduz khuapi omna Kunduz province sung district guk (Tajakistan gamgi kiim) ah Afghan galkapte leh Talibante nung kal a kipanin nasia takin kikaptuah uh hi. Afghan galkapte leh Taliban ten Kunduz khuapi kianga om mun poimawhte tampi kila khin zo hi ci'n gen tuak uh hi (kua pen genna up ding ai tam?)
Taliban ten zan in Kunduz khuapi lak kikna ding Kunduz khuapi nisuahna lam, leilu lam leh nitumna lam ki-umcih (besieged) khin zo a, Kunduz khuapi kila kik zo dek ta hi ci'n gen uh hi. Khanabad district leh Imam-Saheb district kila ta a, Afghan galkap 55 kihingmat hi ci'n Taliban member Mullah Hamidi in Al Jazeera newste kiangah gen hi.
Ahih hangin Afghan galkap ten a genna ah galkap ten Talibante Kunduz khuapi leh hawl zo uh a, ahi zongin Kunduz province tuamtuam sungah kikaptuahna nasia lai mahmah hi ci'n gen uh hi. Afghan interior ministry in hih kikaptuahna ah Talibante 54 kigo ta a, tuate lakah Taliban local commander Qhari Habib kihel hi ci'n gen hi. Afghan defence ministry spokesman General Dawlat Waziri in galkapte Dashti-Archi, Imam-Saheb leh Khan Abad districtte ah mainawt zom zel uh a, Talibante tampi tak kigo ta hi ci'n zanin gen hi. Zan bekin Talibante 30 kigo-in, 13 kikapliam a, a kigote lak panin Talibante' field commander Mullah Mubashr kihel hi ci'n gen beh hi. Zanin Afghan social mediate ah Taliban kigote maan tampi kituangsak a, a pum tung uh-ah thautang a kikapna munte dawksak uh hi.
Tu-in Jowzhan province sunga om Qushtifa district ah zong kikaptuahna nasia mahmah a, Taliban ten mun tampi la hi ung ci'n pulak uh hi.
-Al Jazeera
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.