Tutung UN Khawmpi ah kawlgam sung pan Zomi 5 ka kahna ding vai uh tawh kisai in kasiam tawp in lungdam takin hong suut ning.
Zomi Innkuan USA (ZIUSA) in hun sawtpi sung theihna siamna, thagui thatang, sum leh paai tampi suuk in ana hanciamna hang tawh UN ECOSOC= United Nations Economic and Social Council ah 2014 kum July kha aa kipan in Consultative Status hong ngah hi.
UNO nuai ah Council 4 om aa tua 4 lak ah ECOSOC zong khat in akihel ahi hi. ECOSOC ii vai hawmna khempeuh ah ZIUSA in a ut nak leh kihel thei ahi hi.
Tukum February kha ni 1-2 sung akibawl ding Youth Forum ah akah ding in gamsung pan Pu Nung Sian Tuang leh Tg Cin Lian Khaite ZIUSA in teel hi. February ni 3 -12 sung akibawl ding ahi Social Development tawh kisai khawmpi ah akah ding in gamsung pan in Sia Stephen Gin Lal Mang, Sia Kham Sian Pau leh kei mah Mung Laan Thangte hong teel uh hi.
Hih khawmpite ah akihel nuam te'n hong siau un ci aa ZIUSA in a taangko khiat ih theihsa ciat hi. Kei zong US aa om mipih sapih pawl khat ii hanthotna hang tawh kana siau hi.
A siau tampi om sung pan in ZIUSA te'n hong teelkhia uh ahi hi. Tua hong teel khiat teng in UN ECOSOC khawmpi ah kahtheihna ding in ki siauto leuleu aa ECOSOC in kahtheihna lai hong khak ciang in khawmpi kahding in aki thawi thei pan kahi uh hi.
ECOSOC ii sapna lai leh ZIUSA ii sapna laite tawh visa akinget ciang in olno tak in kingah pah hi.
Gamsung aa kipawlna min tawh kisai in bel min khat peuh tawh paitheih hi aa ut leh khatpeuh phuahtawm suk pak theih lel zong ahi hi. CSO min hoih sim khat bang pua leng kilawm penpen hi. Kipawlna thupi lo kacihna hilo in amin hi masalo kacihna hizaw hi. ZIUSA' i thusiamna hang aa ava kahkha hizaw ung aci nuam pipen hi'ng. Kei bang bel kipawlna min tawh kisai in ka siam tawp aa aki thukhualsak mahmah aa kinei hizaw ing. Vaang ka piak theih zahzah apia nuam ka hizaw hi. Kuama' supna ding mahmah tutung khawmpi kahna ah bawl hetlo ding hi'ng. Cikmah in zong kabawl ngeikei hi. Khawmpi ah thungai ding kahi lel hi.
Lungdam pihna hong pulak akua mapeuh tung ah kalung dam mahmah hi. US gamsung ah zong ahih theih liai leh hong vakkawn nuam ka hih man in Zomi makaite leh meltheih u le nau lawm le gual te'n nong angvaan nading un kong thuum nuam lailai hi.
India gam Bangalore khua Berean Laisiangtho sang pan in B.Th zo khat kahi aa akisap leh Biakinn ah zong thugen thei ing. Thong kakiat sung aa Pasian' nasep lamdangte zong teci pang thei ing. Sia David Suum ii Grace Music Institute sang ah zong kum 3 phial mah sia sem ngei ing in khangno music siam nuam taktak a om leh Staff Note/lungtui hilh thei ing (staff note theilo pi in music ki siamzo taktak ken teh). Gam vai minam vai bel an ngawl tuingawl liang in suut ding akici zong in ngap ing. (Gamvai nasepna hang in thunei te'n bangzah tak in hong man nuam uh hiam cih pen Pu Thawng Khua Thang leh Pu Chin Sian Thang te'n theipen ding uh hi. 2007 kum September kha amaugel mat athuak lai un thunei te'n ka man/photo lak in na dongdong uh hi. A nih un damtuak lai uh in adong nuam te'n dot theih hi).
Tutung khawmpi kahtheihna ding in hong buaipih phadiak ahi ZIUSA makai Pu Do Khan Khup, Pu Go Sawm Khup leh aseppih teng' tung ah kam tawh kigen khia zolo lungdamna kanei hi.
Genkhialh sepkhiat a om leh ngaidam.
Lungdamna lianpi tawh
Mung Laan Thang/ Pu Thang
Zangkong
Zangkong
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.
EmoticonClick to see the code!
To insert emoticon you must added at least one space before the code.