A 2 Veina Zosuan Tuailai Khawmpi pen Tedim khuapi ah 2015 kum April kha 23 pan 26 sung teng nuamtakin kizang thei hi, cih thu kiza hi. Hih khawmpi hon pawi April 23, 2015 ah Chin State Chief Minister U Hung Ngai tangin Finance Minister lah hi-in Tedim gam ai-awh vuanzi zong ahi Pu Nang Za Mung in khaugui attatna leh khawmpi hon thu konghon thugenna nei hi. Pu Nang Za Mung in a genna ah, leitung a gam zawng pente lakah khat ahi Myanmar gamsungah a zawng pen sawnsawn Chin State adingin kumpi in khantohna ding na tampi sem ahih thu leh mailamah zong sem lai ding hi, ci hi. Zomite pen ngeina kician nei-in pau leh lai gina tak anei, Myanmar gam sung a innteek minam khat ahih mah bangin kumpi tawh khut kilen a, ngimna hoih tawh khangthakte hanciam dingin hanthawn hi.
Khawmpi thubulphuh pen “A Bucing Khantohna Ah (Unity and Holistic Development)” cih hi a, nitak simin CMBC biakinn ah kizang hi. Rev. Dr. JM Ngul Khan Pau in Speaker semin Pasian’ thu tangkona nei hi. Tedim Icon Top 10-te in lasa uh a, Kawlpi pan lasiam Cingpi leh Global Zomi Idol Top 10 winner Lia Zambawi (Kalay Center) te in zong uap thei uh hi. Tedim khuapi sung a tumging tumsiamte in tumging tum uh hi. Nitak sim kikhawm 1500 kim phaden hi. Sun hunin FBBC Lai Siangtho sangpi ah sun hunin thusunna kinei a, khua 60 pan minkhum mi 350 kim pha den hi. Thusungte pen biakna lam leh leitung pilna lamah zong leitungbup huam a mi lawhcing leh mi’ tung et vive hi uh a, akihel khate hampha kisa mahmah uh hi. Thusunna bek hi loin mipi lampan dotna dawnna leh kuppihna hun zong nuamtak kizang thei hi.
Thusungte pen thulute anuai abang ahi hi:
Zomi, Zogam leh Zomi by Pa Hang Khan Lian
Zomi leh Makaih Pilna by Dr. Lian Muan Kim
A Citak Khangno Khangto by Rev. Dr. JM Ngul Khan Pau
Pumpi Cidamna by Siamah Vung Deih Cing
Cihtakna Tawh Sum Zonna by Pa Thang Za Sing
Zomi: Zan ni, Tuni, Mailam by Dr. Hau Za Cin
A Bucing Khantohna by Pa Khup Khawm Mung
A Citak Siamsin Lawhcing by Dr. Chinkhanlun Guite
Zeisu Nei Khangno Khangto by Rev. Go Za Nang.
Src:Tedim Post
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.