US IN PHILIPPINES AH GALKAP 300 KOIH SAWM
April 16, 2016: Russia leh Syria leh ISte thu tam post lua hong ci kiaukiau tam pian ahih manin US gum nuam pawlte thapiakna dingin tu ni USte thu lamsang tam hong post deuh ing.
US leh Philippine galkap ten galdo ding dan sinna (military drill/exercise) ni 11 sung "Balikatan 2016" (Shoulder-To-Shoulder 2016) kici zan hal (April 14, 2016) a kipanin Crow Valley, Tarlac province (north of Manila, Philippines) ah nei ngeingai uh a, South China Sea kiim tengah zong neih sawm uh hi. Hih vai tawh kisai-in US Defense Secretary Ashton Carter zong Philippines gamah va zin hi. Hih military exercise a neihna hang uh pen USte South China Sea ah a kigolh nop man uh hi lel hi. Hih South Sea kiim ah tuikulh tampi om a, hih kiim-ah lei sung sum piang (natural resources) tam lua ahih manin Brunei, Malaysia, the Philippines, Vietnam, Taiwan leh China in ko aa hi ci nuam tekin kituh ngeingai uh hi.
Hih military excersise man khit ciangin US in Philippines gamah galkap 300 koih det sawm a, tuate lakah Air Force commando galkap leh kidona vanleng leh helicopter zong koih beh lai ding hi ci'n Defense Secretary Ash Carter in Philippine Defense Secretary Voltaire Gazmi tawh news conference zan in a neihna ah pulak hi. Ashton Carter in Philippines ah A-10C Thunderbolt II ground attack aircraft 5, HH-60G Pave Hawk helicopters 3 leh MC-130H special operations aircraft 1 kikoih ding hi ci'n a gen banah US in Philippineste galvan lam tawh kisai huhna (military assistance) $ 40 million kipia ding hi ci'n galkap a koihna dingin zol zo hi. Philippines gamah Ashton Carter a zin ma-in zong India galkapte kipawlna ding leh galphual koihna ding vai India uliante a kikuppih hangin India in galkap lamsangah bel traingin nei khawm ni in, galphual bel hong pia thei lo ding hi ung na cih san uh hi. Ahih hangin South China Sea kiim-ah galdo din dan sinna neih khopna ding vai ah India uliante na zol zo hi.
Pentagon in zong US in galkap a a kisap bangin a kilaihin kisawl beh zel dinga, tuate South China Sea kiimah training pia dingin kizang ding hi ci'n ci'n gen hi. Hih thu hangin Chinate ciltang mek khak na bang leuleu uh hi. China ulian ten nung diakin Japan in South China Sea ah 3,950-ton a gik Hyuga-class helicopter destroyer a sawl sawmna hangin Group of Seven (G7 - gam hausa 7 kipawlna) foreign ministers ten a thukimna uh a mawhpaih thu na pulak khum hi. Chinese Foreign Ministry spokesman Liu Kang accused in G-7 foreign ministers leh diplomats ten South China Sea ah buaina pian'na ding geel uh a, a kamciamna bangun hih tuikulh kituhna munte ah a kigolh loh ding uh hi a, kilemna a omna theihna dingin pan a lak zawk ding uh ahi hi ci'n gen hi. US Pacific Command chief Admiral Harry Harris in China in Philippineste khuapi Manila panin tuikulh bawl tawm (artificial islands) kici bawl a, hih pen Manila panin tai (miles) 140 in kigam a, hih bangin China ten a tuikulh bawlna pen ‘Great Wall of Sand’ ci hi. Adm. Harry Harris in Chinate South China Sea ah a hat luat ding dalna in US khauh takin a gamtat kul hi ci a, ahih hangin Obama in tua bangin gamta leng China tawh buaina piang ding hi a cih manin US Navy uliante leh Obama kikalah zong kitelsiam lohna lianpi pian' lawh liang hi.
-INQUIRY.net/Fox News/Washington Times
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.