IS TEN SUM A GIAUTAU MANUN A GALKAP LIAMTE UH THAT IN A LUNGTANG LEH KALTE UH ZUAK
April 21, 2016: IS (ISIS/ISIL/Daesh) ten Mosul khuapi leilu lam a ukna lianpi a khah suah manun a sum muhna uh kicing zo lo ahih manin Mosul ah Iraq galkapte tawh a kikaptuahna ua a galkap liamte uh thatin a lungtang leh a kalte uh la khia in Iraq gam sung leh leitung mun tuamtuamah black market in zuak uh hi ci'n Arabic pau a kisuaksak al-Sabah newspaper in gen hi. IS ten hih lungtang leh kalte la khia dingin siavuante aana (force) tawh sawl uh a, a sawlna bangin a gamta nuam lote that zel uh hi ci'n al-Sabah newspaper in gen beh hi.
IS ten a galmatte uh a galkap liamte sisan hawm dingin zong zong uh a, a galmat uh thonga thah dinga kikhum ten sisan tampi vei a piak theihna dingin a thah hun ding uh sot to uh hi ci'n Fars news in suaksak hi. Siavuan ten El Mondo newste kiangah a genna Mosul zato inn panin kal leh lungtang kilakhia si luang 183 kimu hi ci'n gen uh hi. IS ten hih lungtang leh kal la khia dingin Germany mi siavuan khat makaih siavuan hon khat zang uh a, tua lungtang leh kal a lak khiatte uh Syria leh Iraq gam-a Kurdist minamte teenna munte ah a galkap liamte ading (transplant na ding) a zat ding leh zuak dingin puakhia zel uh hi. Nung kum pekin UN a Iraq Ambassador Mohamed Alhakim in IS ten sum bawlna ding lungtang leh kal zang uh a, siavuan a thumang nuam lote mi 12 val that ta uh hi ci'n na gen ngei hi.
Pentagon in Mosul khuapi ISte khut panin lak kikna dingin galkap adviser ding 127 leh Apache helicopterte sawl kik hi ci'n US Defense Minister Ashton Carter in zan halin pulak hi. Ahih hangin Iraq gam a Obama' geelna langpang den Republican Senator John McCain in tua mi 127 in bangmah sem zo tuam kei un teh cih san hi. Institute for the Study of War a sem Iraq specialist Patrick Martin, in zong hih adviser 127 kisawl behna hangin a phattuamna om tuan lo ding a, ahih hangin Apache attack helicopters kisawlte bel phatuam kha ding hi ci'n gen hi.
-Fars New/Guardian
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.