AFGHANISTAN AH SUICIDE BOMB PUAK
April 12, 2015: Afghanistan nisuahna lam-a om Jalalabad khuapi ah zanin Afghan galkap kila thakte (recruits) tuanna bus sihpih bomb tawh kisuam a, galkap 12 a sih banah galkap 38 in liamna tuak hi ci'n Nagarhar province spokesman Ataullah Khogyani in gen hi. Hih galkapte pen Afghante' khuapi Kabul manawh a pai hi a, a liamte nak liam mahmah uh hi ci'n gen beh hi.
Hih bus kisuamna pen Kabul khuapi panin km 125 a gamla hi a, Jalalabad zato inn ah si luang 12 hong kipuak ta a, a liam 38te nak liam thei mahmah uh hi ci'n Jalalabad hospital ulian Ahsanullah Shinwari in gen hi. Nangarhar provincial council chief Ahmad Ali Hazrat in a bus suampa'n motorcycle zangin bus taihsak a, a bomb puaksak hi ci'n gen hi. Taliban ten hih bomb pen ko puahsak hi ci'n kipulak uh hi.
Zan mah in Kabul khuapi ah Afghan education ministry nasemte tuanna mini-bus bomb tawh kisuam a, mi nih a sih banah mi sagih in liamna tuak hi. Kuate gamtatna hiam cih a kipulak kuamah om nai lo hi. Hih mini-bus pen Kabul nisuahna lam-a om Bagrami district ah Afghan education ministry nasemte pua in a tai lai-in lampi ah thang na kisiah hi ci'n education ministry in gen hi. Kiginni in zong Kabul khuapi sunga diplomatic zone sungah US Secretary of State John Kerry in Aghan kumpi uliante tawh kimuhkhawmna a neih khit a sawt loin rocket nih tawh kikap a, a si leh a liam bel om lo hi.
-Al Jazeera and agencies
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.