Thu-um mite' nuntakna sungah a kisam den penin, upna tawh nuntakna ahi hi. Ahi zongin thu-um mite sungah upna tawh nungta loin, muhna tawh a nungta zong tampitak ki om hi. Muhna tawh a nungtate puk pahpah dinga, upna tawh a nungtate hong puk mengmeng khollo ding uh hi.
Muhna in hong puksak pahpah a, upna in hong kipsak semsem hi.
Upna tawh na khatpeuhpeuh aki pulak ciangin, muhna tawh a nungtate in zumhuai sa-in zahpih thei uh a, ahi zongin upna tawh a nungtate in, lungnopna leh khamuan'na khat nei khinkhian lel mawk uh hi. Tua hi-a, na khempeuhte uk-in anei eite' biak vanglian Pasian in, i up i muan'na tawh kizui-in na hong sem ding ahih manin, i up i muan ngamna zahzah a ngah dingte ihi hi.
Jesuh in zong, "A umte adingin na khempeuh hithei hi lo ahi hiam?" na ci hi. (Marka 9:23b)
I up nak leh Pasian in na khempeuh hisak thei-a, ahi zongin eite' up lahna in na khempeuh hisak lo thei ahih manin, muhna tawh nungta loin upna tawh nungta ni.Upna in zawhna hi. Amen!
Khazih sungah, David Tuang
Post a Comment
Ngaihsutna hoih thei penpen tawh a nuai ah Comment na pia zel in maw Sanggam. Laigelh mite thapia in, mi a tampipi te muh theih dingin na Share kawikawi in. Lungdam.